अमेरिका, क्यानाडा व मेक्सिकोय् जुयाच्वंगु विश्वकपय् दक्षिण अफ्रिकाया प्रतिनिधित्व यानादीम्ह ‘मिडफिल्डर’ जेडेन एडम्स म्हिगः शनिबाः मन्त।

खेलकुद मन्त्री गेटन म्याकेन्जीं वय्कः मदूगु पुष्टि यानादीगु खःसां छु जुयाः मदूगु धकाः धयादीगु मदु।खेलकुद मन्त्री म्याकेन्जीं छगू विज्ञप्ति जारी यानाः धयादिल, “जेडेन एडम्स मदुगु खबरं जित तसकं नुगः थुं दीगु दु। दक्षिण अफ्रिकी फुटबलं थःगु दकसिबे बांलाःम्ह युवा प्रतिभा मदयेका च्वनेमाःगु दु।”प्रहरीं शनिबाः सुथय् केप टाउनया केन्द्रीय उपनगर स्कोट्सचेकलुफया छखा छेँय् नीन्यादँ दुम्ह वय्कःया सीम्ह लुइके धुंकाः अनुसन्धान न्ह्याकागु धाःगु दु।

“थ्व घटनायात कयाः अनुसन्धान जुयाच्वंगु दु”, वेस्टर्न केप प्रहरी प्रवक्ता एफसी भ्यान विकं धयादिल। एडम्सं धेंधेंबल्लाय् दक्षिण अफ्रिकाया समूह चरणया फुक्क स्वंगूलिं कासा म्हितादीगु खःसा क्यानडालिसेया नकआउट चरणय् वय्कः कासा ख्यलय् दुहां मवंगु खः।

दक्षिण अफ्रिका नकआउट चरणपाखें हे थुगुसीया विश्वकप धेंधेंबल्ला पाखें पिहांवने धुंकूगु दु। केप टाउनय् जन्मेजुयादीम्ह वय्कलं स्टेलनबोस एफसीपाखें व्यावसायिक करियर न्ह्याकादीगु खःसा सन् २०२५ या जनवरीइ काफ च्याम्पियन्स लिग विजेता ‘मामेलोडी सन्डाउनस् क्लब’ य् आवद्ध जुयादीगु खः। वय्कः दक्षिण अफ्रिकाया समूह ए या चेकियाविरुद्धया कासाया न्ह्यः थः अजि मदूगु लच्छि हे मपुनिवं हे मदुगु खः।

जेडेनं चेक गणतन्त्र विरुद्धया कासाय् न्हापांनिसें हे म्हितेगु यानाहःगु खः व वय्कःया अजि मदुगुया दुःख क्वबिना नापं वय्कलं फुक्क कासाय् मिहेनत यानाः म्हितादीगु धासें दक्षिण अफ्रिकी फुटबल सङ्घं वय्कःया कासाप्रतिया इमान्दारिता व त्यागयात च्वछानागु धाःगु दु ।

Categorized in कासा