स्वक्वःगु अन्तर्राष्ट्रिय मातृभाषा पत्रकारिता सम्मेलन थ्व हे वइगु साउन २४–२७ गते निसे येँ यायेत्यःगु दु।

छगु नेपाल आदिवासी जनजाति पत्रकार महासंघ (फोनिज) व नेवाः पत्रकार राष्ट्रिय दबूया मंकाः ग्वसालय् च्वंगु उगु मुँज्यां अथे निर्णय याःगु खः। ज्याझ्वः फोनिजया ग्वसालय् पत्रकार दबूया संयोजनय् सार्क जनलिस्ट फोरमं न ग्वहालि याइगु जुगु दु। थौ च्वंगु मुँज्याय् सम्मेलनया प्रारम्भिक योजना नाप कार्यक्रमबारे फोनिजया महासचिव समीर बलामी न कार्ययोजना न्ह्यब्बःगु खः।

सम्मेलनय् हलिन्यकं करिब ४० देशं मातृभाषा पत्रकारिता यानाच्वपि पत्रकार तय्सं ब्बति काइगु अनुमान यानातःगु दु। प्यन्हु यकं जुइगु ज्याझ्वलय् प्यानल डिस्कसन, कार्यपत्र प्रस्तुति, सांस्कृतिक झाँकी प्रदर्शन नाप नेपाःया पर्यटकीय थासय् न अवलोकन याकेगु ज्याझ्वः दु।

सम्मेलनया मू मातृभाषा पत्रकारिताया विकास याना व्यावसायिक दयकेगु, सरकारी नीतिइ मातृभाषा पत्रकारिताया महत्त्व स्थापित याकेगु व सम्मेलन लिपा राष्ट्रिय व अन्तर्राष्ट्रिय स्तरय् नेपाःया मातृभाषा पत्रकारिताया उपलब्धिया बारे प्रचार–प्रसार यायेगु जुइ धका ग्वसाः खलकं धाःगु दु। नापं भाषा, लिपि, संस्कृति, संस्कार नाप सम्पदाया संरक्षण व अध्ययन–अन्वेषण तक जुइ कथं सम्मेलनया आज्जु दु।

थ्व स्वया न्ह्यः निकः तक नेवाः पत्रकार राष्ट्रिय दबूया ग्वसालय् अन्तर्राष्ट्रिय मातृभाषा पत्रकारिता सम्मेलन जुइ धुकुगु खः। सम्मेलनय् सार्क जर्नलिस्ट फोरम व फोनिजं सहकार्य याःगु खः।

थौ जुगु तयारी बैठकय् नेवाः पत्रकार राष्ट्रिय दबूपाखे नृपेन्द्रलाल श्रेष्ठ, सुनिल महर्जन, सुरेन्द्र भक्त श्रेष्ठ, केके मानन्धर, राजु नापित, प्रजित शाक्य व तेज नारायण महर्जनं ब्बति काःगु खःसा फोनिजपाखे लक्की चौधरी, समीर बलामी, अर्जुनबहादुर तामाङ, प्रविण श्रेष्ठ, प्रदीप लेखी, अमिर लामा, राजु राजदेव, प्रविण किराँतीपिन्स ब्बति काःगु खः।

Categorized in राष्ट्रिय