तलेजु भवानीया खुयायंकूगु १४ गूगु शताब्दी पुलांगु ऐतिहासिक तिसा लित हयेत अमेरिकी सरकारया प्रतिनिधिलिसे कूटनीतिक कुतः सुरु जूगु दु।येँ महानगरपलिकाया कार्यवाहक नगरप्रमुख सुनिता डङ्गोलं नेपाःया निंतिं अमेरिकाया कार्यवाहक राजदूत स्कट अर्बम नापलानाः तिसा लित हयेत कुतः सुरु यानादिल।

डङ्गोलं धयादिल, “येँपाखें खुयायंकाः विदेशया सङ्ग्रहालय थ्यंकूगु पुरातात्विक महत्व दूगु वस्तु कानुनी व कूटनीतिक प्रक्रिया पूवंकाः थःगु हे देशय् लितहयेगु अभियानय् जुयाच्वनागु दु।” खँल्हाबल्हाया झ्वलय् कार्यवाहक राजदूत स्कट अर्बमं तयादीगु जिज्ञासाय् डङ्गोलं विधिया पालना व मानव अधिकारप्रति पूर्ण प्रतिबद्ध जुयाः नागरिकतय्गु अपेक्षाय् आधारित योजनायात प्राथमिकता बियागु खः धयादिल।तलेजु भवानी बिषयानाः नेवाः समुदायया इष्टदेवी लिसें मल्लकालंनिसेंया शक्ति, शासन व समृद्धिया प्रतीक खः। वयात दैवीशक्ति वा मातृशक्तिकथं पुज्याइ।

कर्नाटवंशी जुजु हरिहरसिंह देवं १४ गूगु शताब्दीइ तलेजु भवानीयात नेपाः दुतहःगु खः। अनंलिपा मल्ल जुजुं तलेजुयात थःगु राज्यया प्रमुख संरक्षक व कुलदेवी माने याःगु इतिहासय् ब्वनेफइ।नेवाः समुदायय् तलेजु भवानीयात तान्त्रिक विधिं पुजा याइ। तलेजु देगःया पुजारीतय्त कर्माचार्य धाइ। तलेजु भवानीया पूजा परम्परा गोप्य जुइ। हनुमान ध्वाखा, ख्वप व यलया तलेजु देगः थन लोकंह्वाः। उगु देगः दँय् छकः अथे धइगु मोहनीया महानवमी कुन्हु जक सर्वसाधारणतय्त चायेकीगु खः।

Categorized in राष्ट्रिय