नेपालभाषा मिसा खलःया ग्वसालय् खलःया संस्थापक नायः व मोतिलक्ष्मी उपासिकाया ११७ क्वःगु बुदिं आइतवाः सुथय् हंगु दु। थथे हनेगु ज्या नेपालभाषा मिसा खलःया जिथि भलसा छेँ स्वयम्भूइ जूगु खः।

नेपालभाषा मिसा खलःया नायः धर्मशोभा तुलाधरया सभाध्यक्षताय् जूगु थुगु उगु ज्याझ्वलय् खलःया छ्याञ्जे प्रेमहिरा तुलाधरं लसकुस यानादीगु खः। मिसा पुचःया संरक्षक सुवर्ण केशरी चित्रकारया मूपाहाँसुइ जूगु उगु ज्याझ्वलय् मोतिलक्ष्मी उपासिकाया किपातय् मिसा पुचःया सकलें दुजः जःपिन्सं  खादा, स्वाँ देछाया वयकः उपासिका मोतिलक्ष्मीयात लुमंकुगु खः।

थुगु बुदिं हना ज्याझ्वलय् बाखँ च्वमि नःलि बज्राचार्यं मिसा साहित्यकार मोतिलक्ष्मी उपासिकायात थःम्हं मचा इलय्निसें म्हस्यूगु खँ कनादिसें वयकःया प्रेरणा कयाः थः नं नेपालभाषा साहित्य ख्यलय् वयागु खँ नं कनादिल।थुकथं हे नुगः खँ कनेगु झ्वलय् सह प्रा. उर्मिला ताम्राकार थःम्हं एसएलसी ब्वनाच्वनागु इलय् वयकःया बारे ब्वनागुलिं मिसापिन्सं नं थुकथंया ज्या यायेफु धैगु भाव ब्वलंगु खँ कनादिसें उकिया हे प्रेरणा थम्हं कयागु अनुभवया खँ नं कनादीगु खः।

ज्याझ्वलय् मूपाहाँ लिसें नेपालभाषा मिसा खलःया पुलांम्ह नायः सुवर्णकेशरी चित्रकारं मोतिलक्ष्मी उपासिकां नेपालभाषाया साहित्य ख्यःयात च्वन्ह्याकेत आपालं योगदान यानावंगु खँ उलादीगु खः। नापं मोतिलक्ष्मी उपासिकां समाजयात यानावंगु योगदानया कदर झीसं न्ह्यावलें याना च्वनेमाःगु खँ कनादीगु खः।

Categorized in राष्ट्रिय