असार मसान्ततक खपत जूगु बिजुलीइ भ्याट म्वाः नेपाल विद्युत् प्राधिकरणं वंगु असार मसान्ततक खपत जूगु बिजुलीइ मूल्य अभिवृद्धि कर (भ्याट) मकाइगु ध्वाथुइकूगु दु।

आन्तरिक राजस्व विभाग लिसें ठूला करदाता कार्यालयया सुचं कथं भुक्तानी जुइ धुंकूगु मूल्य अभिवृद्धि कर रकमयात अग्रिम भुक्तानी कायम यानाः आः वइगु भदौया बिलय् समायोजन यायेगु प्राधिकरणं धाःगु दु। प्राधिकरणं सुचंया पाखें ग्राहकतय्सं भुक्तानी याये धुंकूगु ध्यबायात आः वइगु लय्या बिलय् समायोजन यायेगु यानाः माःगु व्यवस्था याःगु न्ह्यथनातःगु दु।

प्राधिकरणं विद्युत् खपतया लिधंसाय् लय्पतिकं बिलिङ जुइगु याना च्वंगु व वंगु असारय् खपत जूगु विद्युतया बिलिङ साउनय् जारी याःबले कर आकर्षित जुइगु बाय् मजुइगु धइगुलिइ द्विविधा खनेदूगु खः। प्राधिकरणं थ्वहे साउन ८ गते आन्तरिक राजस्व विभाग व ठूला करदाता ज्याकुथियात पत्राचार यासें स्पष्ट यानाबीत इनाप याःगु खः। आर्थिक ऐन, २०८३ लय् विद्युत्य् भ्याट लागू जुइगु व्यवस्था याःगु दु। आन्तरिक राजस्व कार्यालयं सोमबाः हे छगू सुचंया पाखें असार मसान्ततक विद्युत् उपभोग बाय् खपतया बिलिङय् भ्याट मतुइगु स्पष्ट याःगु खः।

विभागं साउन १ गते निसें धाःसा विद्युत् शक्तिया खपतय् न्यूनतम चार्ज बाय् ‘डिमाण्ड’ चार्जय् नापं भ्याट आकर्षित जुइगु धाःगु दु। मूल्य अभिवृद्धि कर ऐन कथं लिपांम्ह उपभोक्ताया निंतिं न्यागू प्रतिशत व मेमेपिनिगु हकय् १३ प्रतिशत भ्याट तुइगु जूगु दु। प्राधिकरणं काइगु शुल्क विद्युत् सेवाया ब्वः जूगुलिं अङ्ग साउन १ लिपा जुइगु खपतय् नियम कथं भ्याट आकर्षित जुइगु विभागं ध्वाथुइकूगु दु।

प्राधिकरणं असार मसान्ततकया बिलय् भ्याट रकम तनाः उपभोक्तायात बिल छ्वःगु खः। थथे बिल छ्वयेधुंकाः उपभोक्तातय्सं गुनासो प्वंकाहःगु खः। ऊर्जा जलस्रोत लिसें सिँचाइमन्त्री विराज भक्त श्रेष्ठं उकी च्यूताः तसें समस्या ज्यंकेगु निंतिं पहल यानादीगु खः।