ठगी, आपराधिक विश्वासघात लिसें सङ्गठित अपराधसम्बन्धी कसुरय् सङ्लग्न जूगु द्वपनय् नेपाल दूरसञ्चार प्राधिकरणया उबलय्या कार्यकारी अध्यक्ष भुपेन्द्र भण्डारीयात ज्वंगु दु।

जिल्ला अदालत येँपाखें उगु मुद्दाय् पक्राउ पुर्जी ज्वनाः केन्द्रीय अनुसन्धान ब्यूरों वंगु प्रहरी टोलीं भण्डारीयात ज्वंगु केन्द्रीय प्रहरी बुखँ कक्षं धाःगु खः। स्मार्ट टेलिकमया फुक्क सम्पत्ति व दूरसञ्चार पूर्वाधार, संरचना, दूरसञ्चार प्रणाली व दूरसञ्चार सञ्जाल प्राधिकरणया नामय् वःगुलिइ नेपाल इन्भेष्टमेन्ट मेगा बैङ्क व एनसेल आजीयाटा लिमिटेडलिसे मिले जुयाः गैरकानुनी रूपं लिलाम याकाः सरकारया हक हनन यानाः गैरकानुनी रूपं लिलामी याःगु द्वपनय् वयात ज्वंगु खः।

ठगी, आपराधिक विश्वासधात नापं सङ्गठित अपराध मुद्दाय् भण्डारीया संलग्नता दूगु प्रारम्भिक अनुसन्धानया झ्वलय् लुयावःगु खः। प्राधिकरणं २०७० वैशाख २ गते स्मार्ट टेलिकम प्रालिया नामय् ब्यूगु आधारभूत टेलिफोन सेवाया अनुमतिपत्र नियमकथं नवीकरण मयाःगुलिं २०८० वैशाख २ गते निसें अत्थें रद्द जूगु खः।

Categorized in राष्ट्रिय