बरिष्ठ पत्रकार किशोर श्रेष्ठयात समाचार च्वःगु विषययात कया प्रहरीं ज्वंगु व जनआस्थाया ज्याकुथिइ छापा मारेयाःगु घटनाप्रति देय् न्यंकंया पत्रकार तय्स बिरोध याउगु दु। अथेहे नेवाः पत्रकार तयेगु संगठन नेवाः पत्रकार राष्ट्रिय दबूया न ध्यानाकर्षण जूगु दु।

नेवाः पत्रकार राष्ट्रिय दबूपाखें छगू विज्ञप्ति सार्वजनिकयासें बरिष्ठ पत्रकार किशोर श्रेष्ठया गिरफ्तारीप्रति ध्यानाकर्षण याकूगु खः।बिहिवाः दबूया महासचिव केके मानन्धर (कृष्णकाजी मानन्धर)पाखें ल्हाःचिं तयाः सार्वजनिक याःगु उगु ध्यानाकर्षण प्रेस विज्ञप्तिइ बरिष्ठ पत्रकार किशोर श्रेष्ठयात समाचार च्वःगु विषययात कया प्रहरीं गिरफ्तार याःगु व जनआस्थाया ज्याकुथिइ छापा मारेयाःगु घटनाप्रति देय् न्यंकंया नेवाः पत्रकारपिनिगु मंकाः संगठन नेवाः पत्रकार राष्ट्रिय दबूया ध्यानाकर्षण जूगु जानकारी ब्यूगु खः।

सार्वजनिक जूगु प्रेस विज्ञप्तिइ धयातःगु दु, ‘समाचारया विषय वस्तुइ विमति जूसा प्रेस काउन्सिल नेपालपाखें कानूनी उपचारया लँपु खुल्ला दु। तर बदनियत कथं पत्रकार श्रेष्ठयात प्रहरीं ज्वंगु समग्र पत्रकारिता जगतया हे स्वतन्त्रताय् न्ह्यसःचिं थंगु दु। थ्वसिबें न्ह्यः वंगु जेष्ठ महिनाय् नं अज्ञात फोनपाखें ब्यूगु धम्की सामाजिक संजालपाखें दुष्प्रचार जूगु घटना पत्रकार श्रेष्ठविरुद्ध नियोजित खनेदु।’

नेवाः राष्ट्रिय पत्रकार दबूया सार्वजनिक जूगु ध्यानाकर्षण विज्ञप्तिइ २०७२ सालय् जारी जूगु नेपाःया संविधानया प्रस्तावनाय् हे अभिव्यक्ति व प्रेस स्वतन्त्रता न्ह्यथना तःसां नं उगु कथं आःया सरकारं व्यवहार मयाःगु प्रष्ट जूगु न्ह्यथना तःगु दु।विज्ञप्तिइ धयातःगु दु, “अथे जुयाः नेवाः पत्रकार राष्ट्रिय दबू बरिष्ठ पत्रकार किशोर श्रेष्ठयात विनासर्त त्वःतेत माग यानाच्वना।”

अथेहे म्हिगः नेपाल पत्रकार महासंघ नाप पत्रकारपिन्स भद्रकाली वना धर्ना ज्याझ्वः याःगु खः।

Categorized in राष्ट्रिय