नेपाल आदिवासी जनजाति पत्रकार महासङ्घ (फोनिज)या ग्वसालय् नेवाः पत्रकार राष्ट्रिय दबूया संयोजनय् ‘स्वक्वःगु अन्तर्राष्ट्रिय मातृभाषा पत्रकारिता सम्मेलन –२०२६’ ज्याझ्वः तःजिक क्वचाःगु दु।

अथेहे फोनिजया २७ क्वःगु स्थापना दिवस न हंगु खः। स्थापन दिवसया लसताय् डण्ड गुरुङ, विमला तुमखेवायात बिशेष सम्मान याःगु खःसा लहना वाःपौ, तिर्थमान बल, सरिता श्रेष्ठ व अविनाश चौधरीयात मूपाहाँ येँ महानगरपालिकाया कार्यवाहक नगर प्रमुख सुनिता डंगोल फोनिज अवार्ड लःल्हागु खः। अथेहे नेवाः पत्रकार राष्ट्रिय दबूयात बिशेष सम्मान याःगु खः।

ज्याझ्वलय् नुगँ खँ तयादीसे मूपाहाँ डंगोलं येँ महानगरपालिका स्थानीय भाषाया सम्वद्र्धन नाप प्रवद्र्धनया नितिं स्थानीय पाठ्यक्रम स्थानीय भाषाय् लागू यानागु खँ कनादिल। आदिवासी जनजाति महासङ्घया नायः निमा ह्योल्मो लामां समय सापेक्ष मातृभाषा पत्रकारिता सम्मेलन जूगु खँय् बः बिसें संविधानय् सुनिश्चित अधिकार कार्यान्वयन जुइमाःगु खँ ल्ह्वनादिल।

प्रेस काउन्सिल नेपालया प्रशासकीय अधिकृत झविन्द्र भुषालं मातृभाषामा पत्रकारिता प्रवद्र्धनया नितिं नीतिगत व्यवस्था दूगु व मातृभाषी पत्रकारपिन्त प्रोत्साहनया निमित्त सिरपाः बियाः वयाच्वनागु खँ कनादिल।फोनिज नायः लक्की चौधरीं मातृभाषी पत्रकारया सहभागीता स्थानीय स्तरय् बल्लायेमा धकाः धयादिल।

ज्याझ्वलय् भारत, श्रीलंका, साउदी अरब, भुटान लगायत देशसा जर्नलिष्ट फोरमया ५४ म्हसिबें अप्वः प्रतिनिधिपिन्स ब्बति काःगु खः।

Categorized in राष्ट्रिय