इन्डोनेसियाया फ्लोरेस टापुइ शनिबाः सुथय् ७.७ म्याग्निच्युडया शक्तिशाली भुखाय् ब्वःगु दु। भुखाचं भवन व छेँत दुनाः म्ह्वतिं नं न्याम्ह सित धाःसा तःधंक भौतिक क्षति जूगु अधिकारीतय्गु धाःगु खः।

भुखाय् लिपा इन्डोनेसियाली अधिकारीतय्सं सुनामीया चेतावनी जारी यानाः तटीय क्षेत्रया बासिन्दातय्त तःजाःथाय् वनेत इनाप याःगु खः। समुद्री सतहय् न्ह्यथनेबहःगू ह्यूपाः खनेमदुगुलिं उगु चेतावनी लितकाःगु मौसम विज्ञान, जलवायु नापं भूभौतिकी एजेन्सीं धाःगु खः। अमेरिकी भूगर्भ सर्वेक्षण (यूएसजीएस)या कथं स्थानीय ई कथं सुथसिया ५ः५८ ताः इलय् फ्लोरेस लागाय् १० किलोमिटर गहिराइलय् भुखाय् ब्वःगु खः।

थुकिया केन्द्रबिन्दु पूर्वी नुसा तेङ्गेरा प्रान्तया एन्डे सहरं उत्तर–उत्तरपश्चिमपाखे ६८ किलोमिटर तापाःगु खः। मुख्य भुखाय् ब्वये धुंकाः पटक–पटक परकम्प नं महसुस याःगु खः।पूर्वी नुसा तेङ्गाराया प्रहरी प्रमुख रुडी डार्मकोकोया कथं भुखाचं यानाः भवन दुनाः सिक्का रिजेन्सीइ निम्ह नापं मङ्गराई रिजेन्सीइ स्वम्ह सीगु खः।

Categorized in अन्तर्राष्ट्रिय