नेपाल आयल निगमं भदौ १ गते सोमबाः निसें सम्बन्धित ग्यास उद्योग पाखें नियुक्त यानातःगु बिक्रेतापाखें नियमित प्रक्रियाकथं ग्यासया बिक्रीवितरणया व्यवस्था मिले यानागु धाःगु दु।

निगमं म्हिगः छगू सुचं जारी यासें थःत पाय्छि जुइगु सत्तिगु ग्यास डिपोय् वनाः स्वापू तयाः ग्यास न्यायेत उपभोक्तायात इनाप याःगु खः। निगमं ग्यास वितरणयात व्यवस्थित दयेकेत न्हिन्हिथं मिइपिं बिक्रेता÷वितरकया नां, थाय्बाय्, स्वापू ल्याः, सिलिन्डर ल्याः लिसेंया धलः न्हिन्हि सुथसिया ९ः०० ताः ईया दुने बिइत उद्योगीयात निर्देशन ब्यूगु दु।

ग्यास बिक्रेता÷वितरकतय्सं मिइगु ग्यासया परिमाण, उपभोक्ताया नां, स्वापू ल्याःलिसेंया विवरण न्हिन्हिथं तयार यानाः अनिवार्य कथं सम्बन्धित उद्योग व सम्बन्धित उद्योगं निगमयात उगु धलः वहे दिं बिइमाःगु दु ।अत्यावश्यक जुपिं घरायसी प्रयोजनया निंतिं छ्यलीपिं उपभोक्तायात उच्च प्राथमिकताय् तयाः ग्यास मिइत लिसें ग्यास ढुवानी व वितरण ज्याय् सुरक्षाया ल्याखं सहजीकरणया निंतिं सम्वन्धित जिल्ला प्रशासन ज्याकुथिइ गृह मन्त्रालयपाखें इनाप याःगु निगमं धाःगु दु।

अथे हे, वाणिज्य, आपूर्ति लिसें उपभोक्ता संरक्षण विभागलिसे इनाप यानाः निगम पाखें खटेजूपिं जनशक्तिनापंया मंकाः पुचःया पाखें नापं ग्यासया वितरण ज्याया अनुगमन यायेगु व्यवस्था मिले यानातःगु दु।

Categorized in राष्ट्रिय