किपूया बाघभैरव देगलय् दँय्दसं भदौ १ गते न्यायेकीगु बाघभैरव जात्रा थौं न्यायेकाच्वंगु दु। बाघभैरवया मूर्ति पलिस्था याःगु दिंया लसताय् थौं उगु जात्रा न्यायेकाच्वंगु खः।

गोपालराज वंशावलीया कथं किपूया पलिस्था राजा शिवदेव तृतीयं नेपाल संवत् २१९ निसे २४६ या दथुइ याःगु न्ह्यथनातःगु दु । किपू पलिस्था जूगु इलय् पाखे हे बाघभैरवया देगः नापं पलिस्था जूगु तायेकाः वयाच्वंगु दु ।छगू किवदन्ती कथं, बाघभैरव दूगु थासय् न्हापा जङ्गल जुगुलिं अन फैजवापिंसं फै–दूगू ज्वःवनीगु इलय् चां दयेकातःगु मे मदुम्ह धुँया मूर्ति दयेकूगु खः ।वहे मूर्तिइ भैरद्यःया रुप कयाः धुँं भ्याचा दुगु म्येय् नयेगु यानाहल।

वहे तंम्वं फैजवापिंसं उम्ह चाया मूर्तिइ मे मतःगुलिं अनया बाघभैरवया मूर्तिइ मे मदूगु धइगु धापू दु। न्हापा होमअनुष्ठान लिसें पुजा यानाः जात्रा न्यायेकेगु यानाच्वंगुलिइ विसं २०१३ भदौ निसें जक बाघभैरवया खः जात्रा यायेगु यानाहःगु संस्कृतिविद् डा ब्रजमुनि बज्राचार्यं जानकारी बियादिल। बाघ भैरव देगलय् स्वंगू मूर्ति दु।

उकि मध्येय् थ्यंमथ्यं १२ गू इन्चया चिधंगु मूर्तियात लक्ष्मी बुइगलय् यंकाः पलिस्था यायेगु याइ। वहे बाघभैरवया मूर्तियात थी थी बाजं लिसें प्यम्हेसिनं खःतय् तयाः क्वबिनाः किपूया पुलांगु नगर चाःहिकीगु परम्परा दु।

उगु खः जात्रा बाघभैरव देगलं न्ह्यानाः चिथु त्वाः, तननी, सिंह दबु, दे पुखू, गल्छेँ, लाय्कू जुकाः हाकनं बाघभैरव देगलय् यंकाः क्वचाइगु किपू वडा नं १ या अध्यक्ष इच्छाकुमार महर्जनं जानकारी बियादिल।

Categorized in राष्ट्रिय