शहरी क्षेत्रय् नेवाः समुदायपाखें दँय् दसं गुँलागा द्वितीयाखुन्हु न्यायेकाः वयाच्वंगु मतयाः जात्रा आइतवाः क्वचागु दु। आइतवाः हे यल जिल्लाया गोदावरी नगरपालिका–१२, थेच्वय् नं बिस्कं मतयाः जात्रा न्यायेकुगु दुसा यलया सुनागुथिइ नं तःजिक मतयाः जात्रा न्यायेकूगु दु।

थेच्वय् जात्राया झ्वलय् थीथी सांस्कृतिक व परम्परागत बाजंलिसें सहभागी जूपिन्सं समाजया विकृति, विसंगति व समसामयिक घटनायात व्यंगात्मक रूपं ख्यालःपाखें न्ह्यब्वःगु खः।थेच्वया १२ गु परम्परागत बाजं खलकं पालंपाः मतयाः जात्रा ग्वसाः ग्वया न्ह्यावयाच्वंगु खः। जात्राया झ्वलय् उत्कृष्ट प्रदर्शनी याःगु ख्यालः व ख्यालिम्वःयात सिरपा नं बिइगु याना वयाच्वंगु दुसा थुगुसिइ न्हाप, ल्यू व लियांल्यू छसिकथं न्हूछेँ दाफा खलः, मालिगां धिमय् खलः व न्ह्यछेँ दाफा खलःपाखें सिरपाः त्याकेत ताःलाःगु खः।

अथेहे, सरस्वती धिमय् खलः हःपाः सिरपा त्याकेत ताःलाःगु खः। बाँलागु प्रस्तुति न्ह्यब्वःगु त्वाः लाईझ्वः त्वाः व उत्कृष्ट मिसा मिजंया भूमिकाय् नवीन महर्जन व अभिमन महर्जन सिरपाः त्याकेत ताःलात । सिरपाः निर्णय यायेत नबिन थेचोमि, रामकृष्ण खड्गी व लक्ष्मीकुमार महर्जनया निर्णायक समिति नीस्वनातःगु खः।

जगत बहादुर महर्जनया सभापतित्वय् जूगु सिरपाः लःल्हायेगु ज्याझ्वलय् बागमती प्रदेश सांसद रघुनाथ महर्जन मूपाहाँ व गोदावरी नगरपालिकाया मेयर गजेन्द्र महर्जन विशेष पाहाँ कथं झायादीगु खःसा ज्याझ्वलय् सानु महर्जनं लसकुस न्वचू व ज्ञान बहादुर महर्जन, हरिराम महर्जन, जित  महर्जन व देवरत्न महर्जनपिन्स नुगःखँ तयादीगु खः।

उगु ज्याझ्वलय् थेचोया न्हापांम्ह वाद्य गुरु सन्तलाल महर्जनयात दोसल्ला न्येका हनापौ देछासे सम्मान नं याःगु खः।

Categorized in राष्ट्रिय