नेवाः न्ह्यलुवा मल्ल के सुन्दरं आवंलि थःत गुगुं नं ज्याझ्वलय् मूपाहां कथं मब्वनेत इनाप यानादीगु दु ।

अथेहे वय्कलं थःत छुं नं ज्याझ्वलय् स्वांमाः, स्वांम्हू, खादागा, सिन्हः, सगं आदि फया कायेत वाध्य मयायेत छुं नं खलः÷पुचः वा ब्यक्तिपाखें हनेकथं हनापौ/च्वछनापौ/सुभाय्पौ नं लःल्हाना मदीत इनाप यानादीगु दु। नेवाः न्ह्यलुवा मल्लं छगू इनाप पौ पितबियादिसें थ्व खँ धयादीगु खः।

‘सकसितं अतिकं हनाबनातसें क्वमिलु भावं छिकपिं सकलनाप मंकाःकथं इनाप याना’ धयादिसें वय्कलं ज्याझ्वलय् सामान्य पाहांकथं थःगु ब्वति धाःसा दयावंच्वनीगु नं धयादीगु दु।

छम्ह हे मनूयात तःक्वः, तःम्हेसिनं हनाच्वनेगु मयासे न्हूपिं, ल्याय्म्ह पुस्तायात हःपाः/अवसर बीमाःगु खँ न्ह्यथनादिसें वय्कलं इनाप पती धयादीगु दु, ‘ब्यक्तियात मखु, बिचाःयात च्वछायेनु ! याकःछियात मखु झी नेवाः जःछियात थकायेनु ।’

Categorized in राष्ट्रिय