पृथ्वी राजमार्गया कृष्णभीरय् सतक तुनावंगुलिं स्वनिगः पिने ग्यास वोटलिङ (जायेकेगु) ज्या जुयाच्वंगु दु।

ग्यास तयाः हइगु बुलेट वने मफइगु जुयाः स्वनिगः व जःखःया जिल्लाया ग्यास उद्योगं स्वनिगः पिने गाडी यंकीगु जूगु दु। नेपाल एलपी ग्यास उद्योग सङ्घया नायः देवान चन्दया कथं नेपाल आयल निगमं उद्योगीयात स्वनिगः पिने ग्यास वोटलिङ यायेत अनुमति ब्यूगु दु।

स्वनिगः व जःखःया जिल्लाय् च्वंगु १६ गू उद्योगं बारा, पर्सा, चितवन, मकवानपुर, नवलपरासी (बर्दघाट–सुस्तापूर्व) जिल्लाया उद्योगलिसे समन्वय यानाः ग्यास वोटलिङ याइगु जूगु दु। स्वनिगः व जःखःया जिल्लाय् जक मुक्कं खपतया ४० प्रतिशत सिबें अप्वः ग्यास मालीगु वय्कलं धयादिल।सङ्घया दुजः नापं जुया च्वनादीम्ह बाबा ग्यासया सञ्चालक विमल कालाखेतीं कृष्णभीरया लँपु मचातक मेमेगु उद्योगय् ग्यास वोटलिङ यानाः वैकल्पिक लँपु पाखें येँय् यंकेगु जानकारी बियादिल।

उगु जिल्लया उद्योगय् वोटलिङ यानाः ग्यास त्रिभुवन राजपथलिसें सतक पाखें स्वनिगः यंकेगु वय्कलं धयादिल। पिनेया उद्योगय् ग्यास वोटलिङ यायेगु ज्या जुइ धुंकुगुलिं स्वनिगः व जःखःया जिल्लाय् अभाव मजुइगु धासें वय्कलं जगेडा मतयेत सुजाः बियादिल।

श्री ग्यासं बाबा, श्रीकृष्णं साइबाबा, श्रीरामं जानकी, नेपाल ग्यासं नेपाल गण्डकी, एभरेष्ट व सुगमं साहारा उद्योगय् ग्यास वोटलिङ याना च्वंगु कालाखेतीं जानकारी बियादिल। मेमेगु उद्योगं नापं स्वनिगः पिनेया उद्योग बाय् मेमगु उद्योगलिसे समन्वय यानाः वोटलिङ याना च्वंगु वय्कलं धयादिल।

Categorized in राष्ट्रिय