भोटेकोशी जुयाः त्रिशुली खुसिइ वःगु खुसिबालय् थानाच्वंम्ह विदुर नगरपालिका–१० या वेत्रावतीं थौं न्हिनय् चन्द्रिका श्रेष्ठया सकुशल उद्धार याःगु दु।

सशस्त्र प्रहरी बल १९ नं गुल्मं खुसिबाः प्रभावित क्षेत्रय् सशस्त्र प्रहरी निरीक्षक सुमन विकया नेतृत्वय् वंगु टोलीं ६४ दँ दुम्ह श्रेष्ठयात वय्कःया छेँया प्यंगूगु तलां उद्धार याःगु खः।

गुल्मया प्रमुख, सशस्त्र प्रहरी नायव उपरीक्षक वीरेन्द्र राउतया कथं खुसिबालं प्रभावित वस्तीया छेँया सामग्री चीकाः ग्वाहालि यायेत थ्यंगु उद्धार टोलीं छेँपाखें मिसाया सः तायेसातिकिं हे वय्कःया उद्धार याःगु खः।वय्कः ध्याचलय् थानाच्वंगु खः।

थप उपचारया निंतिं श्रेष्ठयात येँय् छ्वयाहःगु खः।

Categorized in राष्ट्रिय