नेपालं अङ्ग्रेजयात बुकूगु लसताय् थौं पाल्पाया तानसेनय् ऐतिहासिक भगवती जात्रा (रथयात्रा) पिकायेत्यंगु द। थन दँय् दसं कृष्ण जन्माष्टमीया कन्हय् कुन्हु भगवतीया रथयात्रा पिकाइगु परम्परा दूगु रणउजेश्वरी भगवती गुठी सञ्चालक समितिया नायः अशोक महर्जनं जानकारी बियादिल।

उकथं हे थौं २०७ क्वःगु भगवतीया रथ पिकायेत्यंगु खः।थौं न्हिनेसिया १२ः३० ताःईया भिंगु साइतय् ब्राह्मणपाखें स्वस्ती वाचन याकाः तानसेन नगरपालिका–३ या भगवती त्वालय् च्वंगु भगवतीया देगलं ऐतिहासिक भगवती जात्रा पिकायेगु सञ्चालक समितिया नायः महर्जनं जानकारी बियादिल। न्हापा थें हे बाजागाजा, भीडभाड व उल्लासया दथुइ मजुइगु वय्कःया धापू खः। देश भोटेकोशी खुसिबाःया पीडाय् लानाच्वंगु इलय् संयमित व औपचारिक रूपं जात्रा पिकायेत्यंगु महर्जनं कनादिल। देश शोकया अवस्थाय् दूगुलिं थुगुसी जात्राय् अनावश्यक तामझाम मयायेगु निर्णय जूगु नायः महर्जनं कनादिल। वय्कलं धयादिल, “भोटेकोशीइ वःगु विनाशकारी खुसिबालं तःधंगु मानवीय व भौतिक क्षति याःगुलिं देश शोकय् दु।

थ्व हे अवस्थायात ध्यानय् तयाः जिमिसं विजयोत्सवयात औपचारिकताय् जक सीमित यायेगु निर्णय यानागु खः।” वय्कःया कथं न्हापा थें पञ्चेबाजा, ढिमे बाजा दइमखु। नेपाली सेनाया बाजा धाःसा छ्यलेगु नायः महर्जनं जानकारी बियादिल। लुम्बिनी प्रदेशया मुख्यमन्त्री चेतनारायण आचार्यलिसें उच्च पदस्थ मनूतय्गु उपस्थितिइ रथ पिकाइगु जुइ। नेपाली सेनां सलामी बियाः स्वकः देगः चाःहिइके धुंकाः भगवती रथ यात्रा न्ह्याकी। थुकियात भगवतीजात्रा, रथ यात्राअथे धइगु सिन्दूर जात्रा नं धायेगु याः। भगवतीया देगलं भिंगु साइतय् पिकाःगु भगवतीजात्रा (रथ यात्रा) यात शीत्तलपाटीया मूध्वाखां पिने हयेधुंकाः सरकारया पाखें प्रमुख जिल्ला अधिकारीं पुजा यानाः बलि बिइ।

पाल्पाली प्रशासककथं कर्णेल उजिरसिंह थापाया नेतृत्वय् नेपालं विसं १८७१ पुसनिसें १८७२ जेठतक जूगु अङ्ग्रेजलिसेया युद्धय् बुटवलया जितगढीलिसें थासय् विजय हासिल याःगु लुमन्तिइ विसं १८७७ निसें मद्दिक विजयोत्सव भगवती जात्रा हनावयाच्वंगु स्थानीय राजेन्द्रगोपाल सिंहं कनादिल। “घरेलु ल्वाभः, सैनिक अवस्था कमजोर जूगु अवस्थाय् बुटवल क्षेत्रयात अंग्रेजतय्गु ल्हातय् लाके मबीत कर्णेल थापां बुटवल क्षेत्रया युद्धय् वनेन्ह्यः तानसेनया मध्यभागय् च्वंगु भगवती देवीया तुति भागियानाः ‘युद्धय् विजयी जूसा देगः दयेकाः सिन्दूर जात्रा याये’ व ‘भगवतीया महिमा प्यखेरं च्वयेके’ धकाः भाकल याःगु खः।

निकःतक बुटवल जितगढी क्षेत्रय् जूगु युद्धय् विजयी जुइधुंकाः कर्णेल थापां गजूलिसेंया स्वगू तलाया देगः निर्माण यानाः विसं १९७७ निसें दँय्दसं गुंलागाः नवमीकुन्हु विजयोत्सवकथं माने यायेगु घोषणा यानादीगु थनच्वंपिं ज्येष्ठ नागरिकतय्सं कनादी”, स्थानीय सिंहं धयादिल।अंग्रेजयात युद्धय् बुकूगुलिं विजय जात्रा  कथं न्ह्याकावयाच्वंगु, देगःया नांतकं रणउजिरेश्वरी धकाः नांजाः।

अबलेया नेपाली सेनाया पाल्पा कमाण्डर कर्णेल उजिरसिंह थापां युद्धय् वनेन्ह्यः युद्धय् त्याःसा स्वगू तलाया देगः दयेकाः भगवतीया सिन्दूर जात्रा यायेगु भाकल याःगु खः। युद्धय् त्यायेधुंकाः कर्णेल थापां विसं १८७७ निसें कृष्ण जन्माष्टमीया कन्हय् कुन्हु विजय उत्सव कथं भगवती जात्रा न्ह्याकाहःगु खः। गुगु परम्परा थौंतक न्ह्याना वयाच्वंगु स्थानीय सिंहं कनादिल।

Categorized in राष्ट्रिय