श्रीकृष्णया जन्म जूगु लसताय् थौं देय्या थी थी थासय् रथयात्रा नापं शोभायात्रा पिकायेत्यंगु दु।

पापया पक्षय् जुइपिंत संहार यानाः भिंपिंत रक्षा यायेत भगवान् श्रीकृष्णं जन्म कयादीगु धइगु जनविश्वासलिसें गुंलागाः नवमीकुन्हु देय्न्यंकंया कृष्ण देगलय् रथयात्रा नापं शोभायात्रा पिकायेगु परम्परा न्ह्याकूगु खः। थ्व झ्वलय् उत्तरी भेगया बूढानीलकण्ठय् च्वंगु नेपाल अन्तरराष्ट्रिय श्रीकृष्ण भावनामृत सङ्घ (इस्कोन) या ज्याकुथि लागां थौं विशेष रथयात्रा पिकाइगु ज्याझ्वः दु।

थ्व हे उपलक्ष्यय् येँया थी थी धार्मिक सङ्घसंस्थां नं थौं श्रीकृष्णया झाँकीलिसें शोभायात्रा नापं रथयात्रा पिकायेगु तयारी याःगु खः। थथेहे गोकर्णेश्वर–८ या बेँशीगाउँया श्रीकृष्ण देगः लागां नं थौं रथयात्रा पिकाइगु ज्याझ्वः दूगु वडा अध्यक्ष नन्दलाल श्रेष्ठं जानकारी बियादिल। रथयात्राय् द्वलंद्वः मनूत सहभागी जुइ।

मचांनिसें हे थःगु विचित्र लीला क्यनादीम्ह भगवान् श्रीकृष्णं पुतना, कङ्श, जरासन्ध व शिशुपाल थेंजाःपिं दानवी प्रवृत्तिया संहार यानादीगु पौराणिक ग्रन्थय् न्ह्यथनातःगु दु। धर्म स्थापना यायेत युग युगय् जन्म काये धकाः कुरुक्षेत्रय् अर्जुनयात सत्यया पक्षय् वनीपिनिगु रक्षा असत्यया पक्षय् वनीपिनिगु संहार यायेत अवतार कयाच्वनीगु प्रसङ्ग नं थी थी ग्रन्थय् न्ह्यथनातःगु दु।

Categorized in राष्ट्रिय