जैशीदेवल युवा क्लबया ३३ क्वःगु बुदिंया लसताय् येँ महानगरपालिका वडा नं २१ या सहकार्यय् क्लबं ग्वसाः ग्वःगु न्हय्क्वःगु इन्ट्रा दोजाब तेक्वान्दो प्रतियोगिता २०८३’ तःजिक क्वचाःगु दु।

कासाय् थीथी पुचलय् मुक्कं १२०म्ह कासामिपिसं ब्वति काःगु खः। कासाय् उत्कृष्ट प्रदर्शनया निंतिं सौरव थापायात उत्कृष्ट मिजं कासामि व आभूश्री सिलवालयात उत्कृष्ट मिसा कासामि घोषणा याःगु खः। ज्याझ्वःया मूपाहां येँ महानगरपालिकाया प्रवक्ता लिसें वडा नं १७ या अध्यक्ष नविन मानन्धरं सामाजिक–सांस्कृतिक व खेलकुद क्षेत्रया विकासय् क्लबया योगदानया प्रशंसा यासें येँ महानगरं नेपाःया खेलकुदया विकास व विस्तारय् सदां ग्वाहालि यायेगु प्रतिबद्धता प्वंकादिल ।

ज्याझ्वःया विशेष पाहां व नेपाल तेक्वान्दो संघ बागमतीप्रदेशया उपाध्यक्ष प्रकाश खड्गीं थःगु न्वचु तयेगु झ्वलय् येँया गाउँपालिका व उकिया अन्तर्गतया वडा कार्यालयया ग्वाहालिपाखें नेपाःया खेलकुद क्षेत्रया उन्नतिइ अतुलनीय योगदान जूगु धयादिल।

उकथं हे जैशीदेवल युवा क्लबया नायः व जैशीदेवल तेक्वान्दो दोजाबया संस्थापक राजेश प्रजापतिं थुगु कासाया उद्देश्यया बारे जानकारी बियादिसें कासाय् पदक त्याकूपिं कासामिपिसं क्लबया मुक्कं खर्चय् मेगु छनोट कासाय् ब्वति कायेकेगु जानकारी बियादिसें चिवान कासाय् जुइगु अन्तर्राष्ट्रिय कासाय् ब्वति कायेगु जानकारी बियादीगु खः।

कासाया समापन ज्याझ्वलय् नेपाल तेक्वान्दो संघया पदाधिकारी, नेपाल तेक्वान्दो संघ बागमती प्रदेशया पदाधिकारी, थीथी ख्यःया विशिष्ट व्यक्तित्व, जैशीदेवल युवा क्लबया पदाधिकारी व कार्यसमिति दुजः, क्लबया दुजःपिं, स्थानीयपिनिगु अभिभावक कासामि पिनिगु उपस्थिति दूगु खः।

क्लब नीस्वंगु इलंनिसें सामाजिक ज्या, सांस्कृतिक संरक्षण, कासा व सामाजिक गतिविधिइ युवातय्त दुथ्याकेगु ज्या जुयाच्वंगु दुसा तेक्वान्डो कासाया विकास व कासामिपिनिगु क्षमता अप्वयेकेगु निंतिं निरन्तर रुपंथीथी ज्याझ्वःत न्ह्याकाच्वंगु दु।

Categorized in कासा