नेपालभाषा स्यनामि दबूया ग्वसालय् येँमनपा २२ वडाया ग्वहालिइ येँया नेवाः सांस्कृतिक छेँय् नेपालभाषा प्रशिक्षण सहायक मूपाहाँ येँमनपा शिक्षा वं स्वास्थ्य समितिया संयोजक चिनिकाजी महर्जनं कसाःगा न्ययेका हनापौ लःल्हाःगु दु।

रितेश मल्लया अध्यक्षताय् राजेन्द्र महर्जनं न्ह्याकूगु ज्याझ्वलय् ख्वीदँ पुलकी अनिवार्य अवकाश बीमागु नेपाल सरकारया नियमकथं थीथी ब्वनेकुथिया च्याम्ह नेपालभाषा स्यनामिपिं राधेश्याम महर्जन, प्रमिला तुलाधर, कृष्णा प्यारी श्रेष्ठ, हसना मैया बज्राचार्य, रमा शाक्य, भावना वैद्य, रिता अमात्य व तारा श्रेष्ठपिन्त अवकाश जीवन सुखं हनेफयेमा धकाः भिंतुना नापं हनेगु ज्या याःगु खः।

उगु ज्याझ्वलय् विशिष्ट पाहाँ येँमनपा शिक्षा विभाग प्रमुख नमराज ढकाल, विशेष पाहाँ येँमनपा शिक्षा विभागया शिक्षा अधिकृत केशव ज्ञवाली, नेवाः स्यनामि दबू छ्यान्जे बरुण प्रसाद बैद्य, नेवाः देय् दबूया छ्यान्जे श्रीजनमान श्रेष्ठपिसं भिंतुना न्वचू तयादिगु खः। 

Categorized in राष्ट्रिय