भोटेकोशीइ खुसिबाः वयाः तःधंगु दुःख ब्बलन। खुसिबाः वया प्रभावित जूगु व अकल्पनीय दुःखं सकल नेपाःमित दुःखि जुइमाःगु दु। थज्याःगु इलय् न सामाजिक सञ्जालय् जूगु डिजिटल आक्रमणं नेपाःया समाज गुथे वनाच्वन धइगु न्ह्यसः ब्वलंगु दु।

सामाजिक सञ्जालय् म्हुतु वायेगु, म्वाःमदुगु च्वयेगु ज्या जुयाच्वंगु दु। सभ्य समाजय् उज्याःगु ज्यां नेपाःमितय् छ्यं क्वछिइमाःगु अवस्था वःगु दु।  खुसिइ चुइका यंकूपिं थःथिति मालेगु ज्याय् सरकार माःगु कुतः मयाःगु धकाः सामाजिक सञ्जालपाखे इनाप याःपिंत सहानुभूति बिइगु पलेसा लाथेपाथे म्हुतु वायेगु ज्यां पीडित अझ पीडित जुइमाःगु अवस्था वःगु दु। मनूयाः धर्म धइगु मेपिंत ग्वाहालि यायेगु खः। तर अथे ब्बः बिइगु धइगु समाजयात हे बामलागु कथं कायेमाःगु दु।

छखें थःगु छेँजःपिं गुमे यायेमाःगु दुःख, मेखे सञ्जालय् इनाप यायेगु इलय् ब्बः फयेमालिइगु। थज्याःगु ज्यां धइगु खुसिवाः प्रभावित जूपिंत तःधंगु मानसिक हिंसा खः। थज्याःगु अवस्थाय् पीडिततय्त थःथितिया सास व लास मालेगु कि ब्बः ब्यूपिंत उजुरी तयेगु ? तःधंगु समस्याय् दु। थुगु इलय् राज्य हे नागरिकतय्त न्याय बिइमाःगु खः, तर डिजिटल हिंसाय् लापिंत थुकथं न्याय बीगु अवस्था खनेमदु। छगू दसु खः चिलिमे हाइड्रोपावरया सुरुङ दुने थः जहान मालेत ग्वाहालि फ्वःगु इलय् वयात जूगु दुव्र्यवहार। वयात अपमानजनक व घृणायुक्त ब्बः बिइगु ज्या जूगु दु।

घालय् मलम तयेगु स्वयां चिं ह्वलेगु ज्या जूगु दु । मानवीय समवेदना मदुपिसं पीडितया नुगः ख्वयेकेगु ज्या जूगु दु। रिपोर्टिङय् ज्याय् लगे जूपि पत्रकारतय्त  नं अथे ब्बः बिइगु ज्या मदिक जुयाच्वंगु दु । थज्याःगु ज्यां झीगु समाजया मनोवृत्ति बांलाक खने दुगु दु। अभिव्यक्ति स्वतन्त्रताया दुरुपयोग जुयाच्वंगु थज्याःगु टिप्पणीइ मिखा मब्वयेगु राज्यया कमजोरी खः। थज्याःगु इलय् सामाजिक सञ्जालय् नियमन यायेगु ज्या जुइमाःगु खः । तर, सरकार फेसबुक वा मेमेगु सामाजिक सञ्जालया नियमन यायेगु आँट याये फयाच्वंगु । वंगु आन्दोलन व विरोधया कारण सरकार ग्याःगु जुइफु।

फेसबुक स्थापना जूगु अमेरिकाय् छू ई न्ह्यः जक क्यालिफोर्नियास्थित संघीय अदालतं इन्स्टाग्राम व फेसबुकं माउ कम्पनी मेटायात अर्बौं डलर बः पुलेत बाध्य याःगु दु । मेटाया प्लेटफर्र्म मस्तय्त कुलत यंकूगु, मानसिक हिंसा अप्वयेकूगु व ज्यान वनेगु घटना अप्वःगु धासे अदालतं हानिकारक फिचर (लाइक, कमेन्टया ल्याः, मेमेगु फिल्टर) चिइकेगु व मस्त थाय् याउँक थ्यकेगु सीमित यायेत आदेश ब्यूगु खः।

जब अमेरिकी समाजय् हानिकारक फिचरय् नियमन सुरु जुइ धुंकूगु दुसा व स्वयां अप्वः पीडित जुयाच्वपिं झीगु देशय् नियमन यायेगु निंतिं ग्यायेमाःगु कारण मदु । ब्बःबिइपिंत साइबर अपराधया कानुन लगे याना जक मगाः, सामाजिक सञ्जाल कम्पनीतय्स नं नेपाःया विधिविधान व सांस्कृतिक मूल्यमान्यता कथं न्ह्यायेमाः । भ्युज अप्वयेका डलर कमे यायेगु धेधेंबल्ला यानाः न्ह्याग्गुं सामाजिक सञ्जालय् तयेगु व च्वयेगु याकेबी बिइमज्यु ।

Categorized in राष्ट्रिय