येँ रात्रिकालीन यातायात सेवा अझ विस्तार यायेगु तयारी जुयाच्वंगु दु। उकिया निंतिं अन्तर नगर यातायात सञ्जाल विकास यायेगु खँ येँ महानगरपालिकाया कार्यवाहक मेयर सुनिता डंगोलं जानकारी बियादीगु दु।

स्वनिगःया स्थानीय तहया सहभागिता सुनिश्चित यानाः दिगो प्रणाली स्थापना यायेगु तयारी येँ महानगरं यानाच्वंगु दु।वंगु २०८३ वैशाख निसें येँ महानगरं साझा यातायात लिसेया सहकार्यय् सञ्चालन याःगु रात्रिकालीन यातायातया प्रभाव व सेवा विस्तार अध्ययन लिसे सिफारिस कार्यदलं थःगु प्रतिवेदन येँ महानगरयात लःल्हाये धुंकूगु दु। येँ महानगरं थीथी खुगु न्हुगु रुटय् २८ गः रात्रिकालीन बस सञ्चालन यायेत्यःगु दु।

येँ महानगरपालिकाया कार्यवाहक मेयर सुनिता डंगोलया अध्यक्षताय् म्हिगः येँ महानगरपालिका, यल महानगरपालिका, चन्द्रागिरी नगरपालिका,बुढानीलकण्ठ नगरपालिका, गोदावरी नगरपालिका, किपू नगरपालिका, साझा यातायात नाप सरोकारवाला दथुइ च्वंगु बैठकं रात्रिकालीन बस सेवा विस्तार यायेगु निर्णय यागु खः।

Categorized in राष्ट्रिय