जनकवि दुर्गालाल श्रेष्ठयात लुमंकाः थौ विचाः मुँज्या याःगु दु।येँया नेपाः ब्यांक्वेटय् थौं आइतवाः सुथय् नेपालभाषा मंकाः खलः, नेवाः देय् दबू, नेपालभाषा एकेदेमि, नेपालभाषा मिसा खलः, विराट नेपालभाषा गुथि, नेपाल लिपि गुथि, नेवाः पत्रकार राष्ट्रिय दबूलिसें थीथी खलःपुचःया मंकाः ग्वसालय् विचाः मुँज्या याःगु खः।

विचाः मुँज्याय् नेपालभाषा एकेदेमिया चान्सलर नेवाः न्ह्यलुवा मल्ल के सुन्दरं जनकवि श्रेष्ठयात कयाः दुग्यंक नुगःखँ तसें जनकवि श्रेष्ठ नेपाःया छम्ह धात्थेंम्ह कवि जूगु व जीवनया लिपांगु इलय् नं वय्कः कविता हे च्वयाः विलय जूगु खँ प्वंकादीगु खः । चान्सलर मल्लं जनकवि श्रेष्ठ साहित्य विधाय् कविताय् जक मखु, म्ये, नाटक व सकतां विधाय् पूर्णता दुम्ह व्यक्तित्व जूगु धासें वय्कःया योगदान व जीवनीयात कयाः थःगु विचाः तयादीगु खः।

विचाः मुँज्या ज्याझ्वलय् जनकवि श्रेष्ठया तःधिकःम्ह काय् सुमन श्रेष्ठं थः अबु दुर्गालाल श्रेष्ठयात सकस्यां लुमंकाः मतिना याःगुलिं सुभाय् देछासें दुर्गालाल श्रेष्ठं च्वयादीगु खस भाषाया मृत्यु सम्बन्धी अप्रकाशित चिनाखँ नं ब्वनाः न्यंकादीगु खः।विचाः मुँज्याय् थीथी कलाकारपिन्सं जनकवि श्रेष्ठं च्वयादीगु ‘झी झीगु निम्तिं मदुसां नेपाःया नितिं म्वायेमाः...’ धैगु म्येलिसें थीथी म्ये हालाः न्यंकूगु खःसा कवयित्री प्रतिसरा सायमि, लोककवि राजभाई जकःमिपिन्सं चिनाखँ न्ह्यब्वयादीगु खः।

नेवाः देय् दबूया नायः रश्मिला प्रजापतिया सभापतित्वय् जूगु उगु ज्याझ्वलय् जनकवि दुर्गालाल लुमंकाः छगू मिनेट मौनधारण याःगु खःसा ग्वसाः खलःपाखें जनकवि दुर्गालालया किपातय् स्वाँ देछानाः श्रद्धाञ्जलि प्वंकूगु खः।

Categorized in राष्ट्रिय