छापा माध्यम बचाउ सुझाव कार्यदलं लोककल्याणकारी विज्ञापन कथं बीगु याना च्वंगु ध्यबा कटौती मयायेत इनाप यासें नेकपा (एमाले) या नायः केपी शर्मा ओलीयात ध्यानाकर्षण पौ लःल्हाःगु दु।

कार्यदलया प्रतिनिधिं थौं एमाले केन्द्रीय ज्याकुथि, च्यासलय् नायः ओलीयात नाप लानाः छापा सञ्चारमाध्यमंं फया वयाच्वंगु समस्या व हाथ्याबारे जानकारी याकुसें लोककल्याणकारी विज्ञापनया ध्यबा कटौती मयायेत इनाप याःगु खः। छापा माध्यमया आर्थिक अवस्था कमजोर जुयाः वंगु अवस्थाय् लोककल्याणकारी विज्ञापनया ध्यबा कटौती जुयाः सञ्चारमाध्यमया नियमित प्रकाशन लिसें पत्रकारया लजगाय् तप्यंक लिच्वः लाकीगु कार्यदलं धाःगु दु।

कार्यदलं छापा माध्यमया संरक्षण व प्रवद्र्धनया निंतिं राज्य पाखें बियाः वयाच्वंगु लोककल्याणकारी विज्ञापनयात निरन्तरता बीत लिसें थुकिया ध्यबा कटौती मयायेत सरकारया ध्यानाकर्षण याकूगु दु। नेपाल पत्रकार महासङ्घ, उपत्यका प्रदेश कमिटीया पाखें नीस्वंगु कार्यदलया कजि दामोदर दवाडी व प्रतिनिधिं छापामाध्यमया वर्तमान अवस्था, आर्थिक सङ्कट लिसें सञ्चार ख्यःया दिगोपनाया निंतिं माःगु नीतिगत व्यवस्थाया विषयय् नापं नायः ओलीलिसे सहलह याःगु खः।

नायः ओलीं थःपिं प्रेस लिसें अभिव्यक्ति स्वतन्त्रता नापनापं लोककल्याणकारीया पक्षय् दूगु ध्वाथुइकादिल।

Categorized in राष्ट्रिय