नेपाःया एक दिवसीय टोलीया कप्तान सन्दीप लामिछाने अन्तरराष्ट्रिय क्रिकेटय् ३०० विकेट पूवंकूम्ह न्हापाम्हं बलर जुयादीगु दु।

एसिसी प्रिमियर कपअन्तर्गत शनिबाः युनाइटेड अरब इमिरेट्स (युएई) लिसेया फाइनल कासाय् छगू विकेट कायेत ताःलाकादीगु लिसें वय्कलं उगु उपलब्धि थःगु ल्हाते हयेत ताः लाकादीगु खः। सन्दीपं आःतक एकदिवसीयय् १५८ व टी–२० आई क्रिकेटय् १४२ विकेट कयादीगु दु।

वय्कलं आःतक एकदिवसीय ७९ व टी–२० आई या ७८ गू कासा म्हितादी धुंकूगु दु। सन्दीपं विदेशी कासा ख्यलय् एसिसी प्रिमियर कपया उपाधि त्याकूम्ह नेपाली कप्तानया उपलब्धि नापं थःगु नामय् यानादीगु दु। सन् २०२३ य् जूगु एसिसी प्रिमियर कपया उपाधि नेपालं घरेलु कासा ख्यलय् त्याकूगु खः।

उगु इलय् नेपाली टोलीया कप्तानी रोहितकुमार पौडेलं यानादीगु खः। कप्तान लामिछाने एकदिवसीय एसिसी प्रिमियर कपय् थित्तुंथिक निक्वःगु खुसी ‘प्लेयर अफ द सिरिज’ घोषित जुयादिम्ह न्हापांम्ह कासामि नापं जुयादीगु दु।

वय्कः सन् २०२३ या संस्करणय् नापं उत्कृष्ट कासामि जुयादीगु खः। उगु संस्करणया प्रिमियर कपय् सन्दीपं ५५ रन दयेकूगु खःसा उकिया नापनापं १३ विकेट कयादीगु खः। थुगुसी वय्कलं अझं उत्कृष्ट प्रदर्शन यानादिल।

सन्दीपं एसिसी प्रिमियर कप २०२६ लय् खुगू कासाय् यानाः २.९८ या सानदार इकोनमी रेटय् दकसिबे अप्वः १७ विकेट कयादिल। नेपालं निक्वःगु एसिया कपय् थाय् दयेकूगुलिइ वय्कःया योगदान तसकं महत्वपूर्ण जूवन।

Categorized in कासा