येँयाया निंतिं यःसिं थनेत सिमा पालेगु निंतिं साइत लाकाः थुगुसीया थ्व नखः न्ह्याःगु दु। दँय्दसं भाद्र शुक्ल द्वितीयाया दिं नेपाल पञ्चाङ्ग निर्णायक विकास समितिं ब्यूगु साइतय् वन यात्रा न्ह्याकाः यःसिंया निंतिं सिमा पालेगु निंतिं वनय् वनेगु परम्परा दयाच्वंगु दु।

वहे कथं थौं सुथसीया ९ः५३ या साइतय् वसन्तपुर दरबार क्षेत्रपाखें साइत पिकानातःगु गुठी संस्थानया मुख्य कानुन अधिकृत लिसें प्रवक्ता जनक पोखरेलं जानकारी बियादिल। समितिं येँयाया यःसिं थनेगु निंतिं सिमा पालेगु निंतिं वन यात्रा यायेत ब्यूगु साइतय् पिहां वनाः ख्वपया चाँगुनारायण नगरपालिका–९ ताँथलीया नाला सामुदायिक वनय् वनी।

येँया व बिस्काः जात्राया निंतिं थ्वहे सामुदायिक वन पाखें सल्लाया सिमा हयेगु संस्थानया कर्मचारी रमेश काफ्लें धयादिल। वनय् वनाः तरबार व खड्ग नापनापं सिमाया नापं पुजा यानाः समितिं हे ब्यूगु साइत बहनिसिया ८ः४७ ताः इलय् सिमा पाली। सिमा पाले न्ह्यः दुगुया बलि लिसें तान्त्रिक विधिं पुजा नापं यायेगु परम्परा दु।

येँया या यःसिंया निंतिं सिमा पालेत सामुदायिक वनलिसे सम्झौता यायेगु याना च्वंगु दु। बिस्काः जात्राया यःसिंया निंतिं सिमा पालेत धाःसा ‘टेण्डर’ हे यानातःगु संस्थानं धाःगु दु।

Categorized in राष्ट्रिय