थ्व हे वइगु मंसिरया ३, ४ व ५ गते येँया जनबहालय् आयुताहुति होम व देय्न्यंकं शान्ति स्वस्ति पाठ याइगु जूगु दु ।

श्री आर्यावलोकितेश्वर सुधार समूहया ग्वसालय् जुइगुलि कनकचैत्य महाविहार जनबहालय् आयुताहुति होम व देय्न्यंकं गुरुपिंपाखें शान्ति स्वस्ति पाठ ज्याझ्वः यायेत्यंगु खः। छत्रपाति पार्टी प्यालेसय् जूगु उगु भेलाय् जनबहाः द्यःया गुरुजुलिसें ग्वसाः खलःया कजि नीलकाजी शाक्यं जनबहाः द्यःया देगः पुनःनिर्माणया ज्या थ्यंमथ्यं क्वचायेधूगु जानकारी बियादिसें सकल धर्मावलम्बितय् आस्थाया केन्द्र श्री आर्यावलोकितेश्वर जनबहालय् उगु ज्याझ्वः ग्वसाः ग्वयेत्यनागु जानकारी बियादिल।

देशय् शान्ति जुइमा व व छुं दिं न्ह्यः खुसिबाः वयाः उकी लानाः मदुपिं सुखावति भुवनय् बास लायेमा धइगु कामना यासें उगु ज्याझ्वः ग्वसाः ग्वयेत्यनागु नं वय्कलं कनादिल। आयुताहुनि होम छगू तसकं दुर्लभ होम जूगु व थुुगु होमया बारे यक्वसिके जानकारी मदुगुलिं झीगु धर्म, संस्कार, संस्कृति, परम्परा ल्यंका तयेगु निंतिं उगु होम यायेत्यनागु लिसें देय्न्यंकंया गुरुजुपिंत ब्वनाः शान्ति स्वस्ति पाठ यायेगु जानकारी नं शाक्यं बियादिल।

उगु सहलह ज्याझ्वलय् राष्ट्रिय स्वतन्त्र पार्टी (रास्वपा) या प्रतिनिधिसभा सदस्य गणेश पराजुली पुलांपिं मन्त्रीपिं भीमसेनदास प्रधान, कृष्णगोपाल श्रेष्ठ, येँ महानगरपालिकाया पुलांम्ह प्रमुख विद्यासुन्दर शाक्य, प्रा. डा. नरेशमान वज्राचार्य, नेवाः न्ह्यलुवालिसें थीथी राजनीतिक दया नेवाः न्ह्यलुवापिं, थीथी बहाःबहीया गुरुजुपिं, संघसंस्थाया प्रतिनिधिपिनिगु उपस्थिति दुगु खः।

ज्याझ्वः ताःलोकया निंतिं नीलकाजी शाक्यया संयोजकत्वय् सछि व चय्म्ह दुजः दुगु ग्वाहालि पुचः नं नीस्वंगु खः ।

Categorized in राष्ट्रिय