येँयाः जात्रा तःजिक हनेगु निंतिं येँ महानगरपालिकाया कार्यवाहक मेयर सुनिता डंगोलया अध्यक्षताय् तयारी बैठक च्वंगु दु ।

बैठकय् येँ मनपाया थीथी वडाया अध्यक्ष, गुथि संस्थान, हनुमानढोका हेरचाह अड्डा, हनुमानढोका दरवार क्षेत्र संरक्षण कार्यक्रम, रणवैभव गण, महानगर स्काउट, शार्दुलजंग गुल्म, उपत्यका ट्राफिक प्रहरी, जिल्ला प्रहरी परिसर काठमाडौं, सशस्त्र प्रहरी बल नेपाल १८ नम्बर गण, इन्द्रजात्रा व्यवस्थापन समिति, स्थानीय गुथि व थीथी संघसंस्थाया पदाधिकारीपिनि उपस्थिति दुगु खः।

बैठकय् कार्यवाहक मेयर डंगोलं इन्द्रजात्रा व्यवस्थापन समितिया अध्यक्ष गौतमरत्न शाक्ययात जात्राया निंतिं माःगु खर्च मध्ये २८ लाख ७१ हजार तका चेक लःल्हानादीगु खः। थुगुसी येँयाःया रथ सालेगु झ्वलय् ब्वति काइपिं स्वय्मसेवकतय्त नं नयेगु व त्वनेगु व्यवस्था यायेगु जानकारी कार्यवाहक मेयर डंगोलं बियादीगु दु।उकथं हे वय्कलं कुमारी छेँया जीर्णोद्धार जात्रा न्ह्यः हे क्वचायेकेत निर्देशन नं बियादीगु दु।

थुगुसी येँयाःया झ्वलय् वंगु नीन्यादँ न्ह्यवंनिसें दिनाच्वंगु म्वाहाली पुइगु चलन हाकनं न्ह्याइगु जूगु दु। उकिया निंतिं प्रशिक्षण बीगु ज्या जुयाच्वंगु जानकारी नं वय्कलं बियादीगु दु।

Categorized in राष्ट्रिय