नेपाली कम्युनिष्ट पार्टीया कजि पुष्पकमल दाहालं ‘प्रचण्ड’ संविधानसभापाखें जारी संविधानया उपलब्धियात जनताया जीवनलिसे स्वायेगु व ल्यंदूगु ज्याभाला पूवंकेगु थौंया मुख्य दायित्व जूगु धयादीगु दु।

संविधान दिवस २०८३ या झ्वलय् थौं भिंतुना बियादिसें वय्कलं संविधानं परिकल्पना याःगु वास्तविक ह्यूपाः पूवंकेत सकसिगुं मंकाः कुतः आवश्यक जूगु धयादिल। संविधान, सङ्घीय लोकतान्त्रिक गणतन्त्र व जनतां प्राप्त याःगु अधिकारयात ल्यूने लिछ्यायेगु कुतः स्वीकार्य मजूगु न्ह्यथनादिसें कजि दाहालं संविधानया मूल्य व जनअधिकारयात कमजोर याइगु गतिविधिविरुद्ध लोकतान्त्रिक शक्तित छधी जुइमाःगुलिइ बः बियादिल।

“राजनीतिक ह्यूपाःयात आर्थिक–सामाजिक रूपान्तरणनाप स्वानाः शिक्षा, स्वास्थ्य, रोजगारी, उत्पादन व समान ह्वःतालय् फुक्क नागरिकया पहुँच सुनिश्चित यायेमाः। संविधानया आखः जक मखु, थुकिया आत्मायात जनताया न्हिंन्हिथंया जीवनय् अनुभूत जुइकथं कार्यान्वयन यायेमाः”, कजि दाहालं पितब्वःगु भिंतुना सन्देशय् धयातःगु खः।

वय्कलं संविधान केवल छगू कानुनी दस्तावेज जक मखु नेपाःया जनताया त्याग व बलिदानं वःगु ऐतिहासिक राजनीतिक उपलब्धिया संस्थागत अभिव्यक्ति जूगु धयादिल।

Categorized in राष्ट्रिय