महाकवि सिद्धिदास महाजुया १५९ क्वःगु जन्म जयन्तीया झ्वलय् नसंचा उलेज्या लिसे दिपावली ज्याझ्वः जूगु दु। सिद्धिदास चोकं न्ह्याःगु नसंचा उले ज्याझ्वलय् नेपालभाषा एकेदेमीया चान्सलर मल्ल के. सुन्दर, नेपालभाषा आन्दोलनया न्ह्यलुवा गणेश साय्मि, संस्कृतिविद् छत्रबहादुर कायस्थ, प्रतिनिधिसभाया दुजः सांसद कुलभक्त शाक्य व प्रदेशसभा दुजः शैलेन्द्रमान वज्राचार्यया लिसें भाषाख्याःया आपालं नेता कार्यकर्तापिंसं ब्वति काःगु खः।

नसंचा उले ज्याझ्वलय् नेपाल आर्मीया बग्गीलय् सिद्धिदास महाजुया किपा तयाः कुमारी रुछ लाहिलेगु ज्या जूगु खः। ज्याझ्वलय् २७ वडा अध्यक्ष योगेशकुमार खड्गी ज्याझ्वलय् ब्वति काःपिंत स्वांमाः क्वखायेकाः लसकुस यानादीगु खः। नसंचा उले ज्याझ्वलय् थीथी स्कुलया शिक्षक÷विद्यार्थी, ट्राफिक प्रहरी, नेपाल प्रहरी, येँ महागनरपालिकाया नगर प्रहरी बल, नेपाली सेनाया बैण्ड बाजा व थीथी सञ्चार क्षेत्रय् ज्या यानाच्वंपिं सञ्चारकर्मीपिंसं ब्वति काःगु खः।

नेपालभाषा मंकाः खलः, मछिन्द्र क्लब व सिद्धिदास स्मृति समाजया मंकाः ग्वसालय् सिद्धिदास चोकं न्ह्याःगु ¥याली कुमारी रथ सालीगु रुट चाःहिलाः जनबहालय् थ्यंकाः क्वचायेकूगु खः । बहनीइ सिद्धादास चोकय् दिपावली यायेगु ज्या नं जूगु खः। उगु ज्याझ्वलय् नं थीथी संघसंस्थाया प्रतिनिधि लिसें भाषाख्यःया नेता कार्यकर्तापिसं ब्वति कयादीगु खः।

Categorized in राष्ट्रिय