जनकवि दुर्गालाल श्रेष्ठयात मदयेधुंकाः ‘जनकवि अक्षरमहर्षि सम्मानं’ छाय्पिउगु दु । दुर्गालाल साहित्य प्रतिष्ठान व बसन्त चौधरी फाउण्डेशनया ग्वसालय् जूगु उगु ज्याझ्वलय् येँ महानगरपालिकाया कार्यवाहक मेयर सुनिता डंगोलं मदुम्ह जनकवि श्रेष्ठयात उगु सम्मानं छायेपीगु ज्या यानादीगु खः।

मदुम्ह जनकविया लत्याया पुण्यतिथिया न्हि कुन्हु लाकाः सम्मानं छायेपीगुया लिसें वय्कःया खुगू सफू पितब्वज्या याःगु खः। ज्याझ्वलय् सम्बोधन यासें कार्यवाहक मेयर डंगोलं जनकवि श्रेष्ठ म्वानाच्वंगु इलय् उगु सम्मानं छायेपीगु योजना दुगु खःसां नं आकाझाकां वय्कः मदुगुलिं मरोणपरान्त सम्मान यायेगु ज्या जूगु खँ कनादिल।ज्याझ्वलय् मदुम्ह जनकविया कविता स्वम्ह कविपिंसं ब्वनाः न्यंकादीगु खः।

वय्कःया मचा कविता सजगता मानन्धर, नेपालभाषां च्वयातःगु कविता कवयित्री प्रतिसरा साय्मि व खस नेपाली भासं च्वयातःगु कविता रमण घिमिरें ब्वनाः न्यंकादीगु खः।उकथं हे ज्याझ्वलय् मदुम्ह जनकवि श्रेष्ठया अनुवादित सफू ‘पीजा’ या नेपाली भासं अनुवाद यानातःगु छुं रुवाईत बसन्त चौधरीं लसय् हनाः न्यंकादीगु खः

ज्याझ्वलय् जनकविया कवितायात कयाः समालोचकपिं अभि सुवेदी व ज्योतिप्रभा तुलाधरं टिप्पणी यानादीगु खः।ज्याझ्वलय् जनकविया काय् भाजु सुमन श्रेष्ठं जनकवि श्रेष्ठया छपु पिमदनीगु कविता ब्वनाः न्यंकादीगु खः। ज्याझ्वलय् नेपालभाषा व नेपाली भाय्या साहित्यकारत लिसें यक्व भाषिक कार्यकर्तातय्सं ब्वति काःगु खः।

Categorized in राष्ट्रिय