विराट नेपालभाषा साहित्य सम्मेलन गुथि (विराट गुथिं) महाकवि सिद्धिदास महाजुया १५९ क्वःगु बुदिं हंगु दु।

उगु ज्याझ्वलय् साहित्यकारपिंसं महाकवि सिद्धिदासया चिनाखँ ब्वनाः बुदिं हनेज्या जूगु खः ।ज्याझ्वलय् मूपाहांकथं सिद्धिदास प्रतिष्ठान ख्वपया नायः व विराट नेपालभाषा साहित्य सम्मेलन गुथिया संस्थापक दुजः व सल्लाहकार नरेन्द्रभक्त हाडा झायादीगु खः।

ज्याझ्वलय् न्ववासें वय्कलं ख्वपय् महाकवि सिद्धिदासया नामं सिद्धिदास प्रतिष्ठान चायेकाः थीथी गतिविधि यायेखंगु गौरवया खँ जूगु न्ह्यथनादिसें राष्ट्रियस्तरय् विराटं यानाच्वंगु थीथी गतिविधियात च्वछायादिल। विराट गुथिया नायः महेन्द्रगोपाल कर्माचार्यया सभापतित्वय् जूगु बुदिं हने ज्याय् विराटया छ्याञ्जे प्रदीपरत्न शाक्यं जनकवि अक्षरमहर्षि दुर्गालाल श्रेष्ठं महाकवि सिद्धिदासया लुमन्तिइ च्वयादीगु नसंचा म्येँ न्यंकाः लसकुस यानादीगु खः ।

ज्याझ्वलय् मिमला शर्मा, सुलोचना सैंजू, संगीता पञ्च व ज्ञानकेशरी श्रेष्ठपिंसं महाकवि सिद्धिदास महाजुं च्वयातःगु थीथी चिनाखँ ब्वनाः न्यंकादीगु खः। विराटया दुजः महेन्द्ररत्न शाक्यं महाकवि सिद्धिदास महाजुया बःचाहाकलं जीवनी ब्वनाः न्यंकादीगु खः। 

Categorized in राष्ट्रिय