ऐतिहासिक लिसें सांस्कृतिक नखः येँयाःया लिपांगु दिं म्हिगः बहनि ९ः२५ ताःईया साइतय् यःसिं क्वःथलाः जात्रा क्वचाःगु दु । भाद्र शुक्ल द्वादशीया दिनय् हनुमानध्वाखा दरबार लागाय् यःसिं थनाः न्ह्याःगु येँयाः स्वनिगःया छगू ताः हाकःगु जात्रा खः । म्हिगः बहनि यःसिं क्वथःगु लिसें च्याचाः ताःहाकःगु जात्रा क्वचाःगु गुठी संस्थानं धाःगु दु ।

थ्वसिबें न्ह्यः राष्ट्रपति रामचन्द्र पौडेल हनुमानध्वाखा दरबार लागा झायाः श्रीगणेश, श्रीभैरव व श्रीकुमारीया पाखें स्वां लिसें प्रसाद कयादीगु खः । स्वां प्रसाद कायादी धुंकाः राष्ट्राध्यक्षं कुमारी नाप खड्ग हिलीगु परम्परा दु । म्हिगः हे न्हिनय् मिसापिंसं जक रथ सालाः नानीचा यात्रा याःगु खः । थ्व खः जात्राया लिपांगु दिं नापं खः।

येँयाःया लसताय् थ्वहे असोज १० गते श्री गणेश, श्री भैरव व श्री कुमारीया रथ थःनेयाः यानाः रथ यात्रा याःगु खः । येँयाःया मू दिं असोज ९ गते शुक्रबाः श्रीगणेश, श्री भैरव व श्रीकुमारीया रथ क्वःनेयाः यानाः रथ यात्रा याःगु खः। यःसिं क्वःथले धुंकाः यःसिंयात टेकु दोभानया वाग्मती खुसि सिथय् चुइकेयंकी । यःसिं चुइकेत सालाः यंकेगु परम्परा दु ।

नेपाल पञ्चाङ्ग निर्णायक विकास समितिं पिकाःगु साइतय् भाद्र शुक्ल द्वितीयाया दिं यःसिं कायेगु निंतिं सिमा पालेत वनयात्रा याइगु लिसें जात्राया प्रक्रिया न्ह्याइ । वनयात्रा, सिमा पालेगु, यःसिं नगर प्रवेशलिसेंया थी थी विधि लिपा भाद्र शुक्ल द्वादशीया दिंकुन्हु यःसिं थनेगु याइ ।

Categorized in राष्ट्रिय