नेपाल प्रेस काउन्सिलं जारी याःगु विज्ञप्तियात कयाः नेपाल पत्रकार महासंघं आपत्ति प्वंकूगु दु।महासंघया पुलांम्ह लेखा समितिया संयोजक दिपक पाण्डेयात थीथी द्वपं बियाःं काउन्सिलया लेटरहेडय् जारी याःगु विज्ञप्ति लित कायेत नं महासंघं माग याःगु दु।

महासंघया महासचिव रामप्रसाद दाहालं छगू विज्ञप्ति जारी यासें उगु माग यानादीगु खः।काउन्सिल थेंंज्याःगु गरिमामय व सन्तुलनकारी निकायया नामय् वःगु यकःति विज्ञप्तिं वातावरण स्यंकीगु धासें लित कयाः सहज वातावरण दयेकेत ध्यानाकर्षणं विज्ञप्ति याकातःगु दु ।

छापा माध्यमयात बिया वयाच्वंगु लोककल्याणकारी विज्ञापनया बछि ध्यबा क्वपालेवं ब्वलंगु समस्या ज्यंकेगु निंतिं थ्वहे वंगु असोज १३ गते महासंघ व प्रेस काउन्सिल नेपाल दथुइ सहलह जूगु खः। सहलहया झ्वलय् निगू पक्ष दथुइ भनाभन जूगु खः। उगु इलय् पाण्डें काउन्सिलया अध्यक्ष उमेश श्रेष्ठयात झ्यालं वांछ्वयाबीगु धकाः धम्की बिउगु खः।

थुकियात हे कयाः काउन्सिलं वक्तव्य पिथंगु खः।महासंघ उगु सहलह ज्याझ्वलय् ब्वति हे मकाःपिं काउन्सिलया दुजःपिंसं हस्ताक्षर यानाः विज्ञप्ति जारी याःगु धासें आपत्ति प्वंकूगु खः । विज्ञप्तिइ धयातःगु दु, ‘सहलहय् दुमथ्याःपिं काउन्सिलया दुजःपिसं यकःति रुपं थुकथं वक्तव्यबाजी यायेगु ज्यां काउन्सिलया सन्तुलनकारी भूमिकाय् न्ह्यसः ब्वलंगु महासंघया ठहर दु।’

Categorized in राष्ट्रिय