ह्याह्याउँनिभाः अनुसन्धान केन्द्रं ह्याउँनिभाः जर्नल, थीथी खुथी सफू व ह्याउँनिभाः इसफूपसः पितबिल। केन्द्रया निक्वःगु दँमुँज्या सफू पितब्वःगु खः।

ज्याझ्वलय् विद्यावारिधि यानाः नेवाः प्राज्ञिक ख्यलय् योगदान बियाच्वंपिं १४ म्ह डाक्टरपिंत हनेगु ज्या नं जूगु खः। अनुप सिं सुवालया सभाध्यक्षताय् जूगु उगु ज्याझ्वलय् ह्याउँनिभाः जर्नल एमफिल व पीएचडी यानाच्वंपिं शोधार्थीतय्त लक्षित यानाः उमिगु सहजताया लागिं पिथनागु खँ कनादिल। इसफूपसलं सफू च्वइपिं श्रष्टायात सहज याइगु भलसा कयादिल। ज्याझ्वलय् प्रा.डा. कृष्ण हाछेथु, प्रा.डा. चुन्दा वज्राचार्य, प्रा. डा. चन्द्रमान वज्राचार्य, प्रा. डा. ओमकारेश्वर श्रेष्ठ, प्रा. डा. सावित्री कक्षपति, प्रा. डा. अरहन स्थापित, डा. गोपाल धौबञ्जार, सहप्रा.डा. टिकाराम पौडेल, उपप्रा. डा. सुदीप नकःमि, व उपप्रा. डा. राजीव रञ्जितयात ज्याझ्वःया मूपाहां लिसे बागमति प्रदेशसभा सांसद समिता खड्गी श्रेष्ठ व केन्द्रया पदाधिकारीपिंसं हनादीगु खः।

ज्याझ्वलय् नुगः खँ तयेगु झ्वलय् डा. कृष्ण हाछेथुं ह्याउँनिभाः अनुसन्धान केन्द्रलिसे थः सहकार्य यानाः न्ह्याःवनेत तयार दुगु खँ कनादिल। उकथं हे डा. चुन्दा वज्राचार्यं ह्याउँनिभालं स्थापनाकालंनिसें याःगु ज्या च्वछासें अनुसन्धान ख्यलय् नं थःत तब्या याःगुलिं नेवाः अनुसन्धानय् तिबः जुइगु खँ धयादिल।ज्याझ्वलय् न्याथी सफू व इसफूपसः मूपाहां श्रेष्ठं पितब्वज्या यानादीगु खः। पूर्णिमा शाक्यया हाइकु सफुती न्याम्ह समालोचकं समालोचना याःगु मतिनाया ख्वबि (हाइकु) दुवाला, ओमकारेश्वर श्रेष्ठया नेवाः कुनाबिना, अनुप सिं सुवालया अनौपनिवेशिकृत आदिवासी शिक्षाशास्त्र, अनुप सिं सुवालका तीन नाटक व कोसल्वहँ व मेमेगु नाटक पितबिउगु खः ।

ज्याझ्वलय् ह्याउँनिभाःया संरक्षक मनराजा रञ्जितं इसफूती गुकथं सफू न्यायेगु कनादिल। उकथं हे ज्याझ्वलय् ह्याउँनिभाः जर्नल न्हापांगु ल्याःया पिथब्वज्या सम्पादकपिंसं व मूपाहां नं मंकाःकथं यानादिल । जर्नलया मूसम्पादक प्रा.डा. ओमकारेश्वर श्रेष्ठं जर्नलं नेवाः अध्येतापिंत तिबः बीगुलिसें थुकिं नेवाः अनुसन्धानयात तब्याकीगु भलसा क्यनादिल। ज्याझ्वलय् केन्द्रं न्ह्याकूगु प्राज्ञिक लेखन ज्याझ्वलय् ब्वति काःपिन्त दसिपौ नं लःल्हाःगु खः ।

प्रशिक्षणय् ब्वतिकाःपिंत केन्द्रया मूदुजः रितेश मल्लं सुभाय् बियादिल। मूपाहां श्रेष्ठं केन्द्रलिसे स्वानाः थम्हं नं नेवाः प्राज्ञिक ख्यलं छुं सयेकेखंगु खँ धयादिल। केन्द्रया प्राज्ञिक ज्यां देस व नेवाः समाजयात भिंकीगु मनंखंगुलिं मेगु दँय् नं केन्द्रया लागि फूचाःकथं माःगु ग्वाहालि यायेगु प्रतिवद्धता प्वंकादिल।ज्याझ्वलय् लसकुस न्वचू सचीब योेगेन्द्र राजकर्णिकार, सुभाय् न्वचू उपाध्यक्ष मनरा प्रजापतिं बियादीगु खः। 

Categorized in राष्ट्रिय