सूर्यविनायक नगरपालिका–८ जगातीइ च्वंगु कँपलिचोकय् सञ्चालित प्लास्टिक दाना दयेकीगु कारखानाय् थौं मि च्याःगु दु। नवराज भट्टं सञ्चालन याःगु विके सप्लायर्सय् थौं सुथय् मि च्याःगु खः।

मि च्यायेधुंकाः जुद्ध बारुण यन्त्र ख्वपया दमकल व स्थानीयतय्गु ग्वाहालिं थ्यंमथ्यं निघौ लिपा मि नियन्त्रणय् काःगु दु। जुद्ध बारुण यन्त्र ज्याकुथि ख्वपया प्रमुख विजय धौभडेलं मि च्यानाः तःधंगु क्षति जूगु जानकारी बियादिल। वय्कःया कथं मि च्यानाः कारखानाय् च्वंगु मेसिन व प्लास्टिकया कच्चा पदार्थ पूवंकं क्षति जूगु दु सा कारखाना नापं च्वंगु दिनेश मचामसीया छेँय् नापं क्षति जूगु जानकारी बियादिल ।

मि च्यानाः थ्यंमथ्यं पीगू लख तका सिबें अप्वःया क्षति जूगु प्रहरीं जानकारी ब्यूगु दु । छु जुयाः मि च्याःगु धइगु धाःसा सी मदुनिसा घट्नास्थलय् प्रहरीं मुचुल्का कायेगु ज्या याःगु दु। मि च्याःगु खबर वयेवं बागमती प्रदेशया मुख्यमन्त्री किरण थापा मगरं मि च्याःगु उद्योगया निरीक्षण नापं यानादिल ।

Categorized in राष्ट्रिय