अर्जेन्टिनाया महान् फुटबल कासामि लियोनेल मेस्सीं मङ्गलबाः राष्ट्रिय टोली पाखें भावुक बिदाइ कयादीगु दु। ब्युनस आयर्सय् च्वंगु मोनुमेन्टल स्टेडियमय् ८५ द्वः कासा ह्यमिया दथुइ बेनिनयात ३–० गोलं बुकाः वय्कलं २१ दँ ताःहाकःगु अन्तर्राष्ट्रिय फुटबल यात्रा अन्त्य यानादीगु खः।

३९ दँ दुम्ह मेस्सीं थःगु कीर्तिमानी २०८ क्वःगु अन्तर्राष्ट्रिय कासाय् १२६ गूगु गोल यानाः बिदाइयात लुमंकातये बहःगु जुइकाबिल। वय्कलं निकोलस ओटामेन्डीया न्हापांगु गोलया निंतिं ग्वाहालि याना दिलसा निको पाजं मेगु गोल यानादिल। मेस्सीं कासाय् ७१ गूगु मिनेटय् पेनाल्टीपाखें गोल यानादीगु खः। कासाया लिच्वः सिबें मेस्सीया बिदाइ हे मू आकर्षण जूवन।

‘द लास्ट ट्याङ्गो’ नां बियातःगु ज्याझ्वलय् वय्कःया ह्यमिं ब्यूगु मतिना व सम्मान ग्रहण यानादिल। कासा लिपा सम्बोधन यानादिसें वय्कलं २० दँ सिबें अप्वः ई अर्जेन्टिनाया जर्सी फिनाः म्हिते दूगु थःगु जीवनया निंतिं तःधंगु गौरव जूगु धायादिल। “जि जीवंकाछि म्हिते मःदु, अथे जूसां जिं तायेका आः थ्व ई वःगु दु। राष्ट्रिय टोलीया निंतिं थःम्हेस्यां म्हितेखंगु दकसिबें बांलाःगु खँ खः”, वय्कलं धायादिल।

स्टेडियमपाखे मेस्सी व वय्कःया टोलीया पासापिं च्वना वःगु बस न्ह्याः बले ह्यमिपिनिगु तःधंगु भीडं लसकुस याःगु खः। उगु झ्वलय् वय्कलं भावुक जुयाः ख्वबि हायेकादिल। वय्कः थः स्वम्ह मस्तलिसें कासा ख्यलय् दुहां झायादीगु खःसा वय्कःया तिरि मयजु एन्टोनेला रोकुजो व मांसेलिया कुसिट्टिनीं भिआइपी कक्षपाखें वय्कःयात ल्हाः संकाः लसकुस यानादिल।

कासा न्ह्याये न्ह्यः कासा ख्यलय् मेस्सीया १० नम्बरया जर्सीलय् ‘ग्रेसियस’ अथे धयागु ‘सुभाय्’ च्वयातःगु तःपाःगु अर्जेन्टिनी जर्सी तयातःगु खः। कासाया १० गूगु मिनेटय् वय्कःया जर्सी नम्बरयात सम्मान प्वंकुसें कासायात छुं ईया निंतिं दिकूगु खः व ह्यमिंपिंसं छगू मिनेट तक ल्हापा थाना च्वंगु खः। लिपांगु सिठ्ठी लिपा ड्रोनपाखें सर्गतय् मेस्सीया किपा क्यंसें वय्कःयात सुभाय् ब्यूगु खः।

Categorized in कासा