नेपाःया सांगितिक ख्यलय् अतिकं हे नांजाःम्ह व्यक्तित्व लोकगायक रत्न बेहोशी बज्राचार्य थौं बुधवाः सुथय् थ्यंमथ्यं १० ताः इलय् आकाझाकां मन्त।

यल महानगरपालिका १६ वडा कलाकार समितिया संयोजक सुरजवीर बज्राचार्यं बियादीगु जानकारी कथं वय्कः थौं सुथय् ट्वाइलेट वनेगु झ्वलय् आकाझाकां दयाः यलया थःगु हे छेँय् हे मदूगु खः।संयोजक बज्राचार्यं लोकगायक रत्न बेहोशीया तःधंगु ल्वय् छुं मदुगु तर आकाझाकां थथे दयेवं छेँय् हे मदूगु जानकारी बियादीगु दु।

९३ दँया रत्न बेहोशीयात ललितरत्नया सम्मान बियातःगु दुसा वय्कः नेपाःया पुलांम्ह लोकगायक खः। नेपालभाषाय् वय्कःया म्ये आः नं लोकं ह्वाः। वय्कलं ‘राजमहलया न्ह्याइपु बजारय्...’, ‘काय् मचा ल्यायम्ह जूगु स्वयेबलय् ब्याहा यायेमाःथें च्वं’, अथेहे खस नेपाली भाषां ‘दाई कहाँको...’ लिसें आपालं म्ये हालादीगु दु।

मदुम्ह रत्न बेहोशी बज्राचार्यया सीम्ह आः (न्हिनय् २ः३० ता इलय्) नेपालभाषा मंकाः खलः यलय् निघौया नितिं अन्तिम श्रद्धाञ्जलि देछायेत तयातःगु दु । थ्वया लिपा वय्कःया अन्तिम संस्कार पशुपति दीपय् जुइत्यंगु दु। 

Categorized in राष्ट्रिय