येँ/नेपाःया संगीत ख्यलय् नांजाःम्ह म्येहालामि भीम तुलाधरलिसें नांजाःम्ह व्यवसायी व सौरभ ज्योति व मेपिं गुम्ह म्येहालामिया नं सलय् ‘मोहनि नखः वल’ म्ये सार्वजनिक जूगु दु ।

शनिबाः येँय् छगू ज्याझ्वःया दथुइ उगु म्योया म्यूजिक भिडियो सार्वजनिक याःगु खः ।

ज्याझ्वलय् न्ववासें म्यहोलामि तुलाधरं थम्हं छपु म्ये बांलाकेत याये फक्व कुतः यानां म्ये स्वकुमिया ल्हातय् तयाबियागु धासें लाइक, शेयर, कमेन्ट यानां ग्वाहालि यानाबीत सकसित इनाप यानादिल ।

अथेहे, नेपालभाषाया रंगीन बाःछिपौ पेजथ्रीया सम्पादक दर्शनवीर शाक्यं म्येया भिडियोलय् पुलांगुनिसें आधुनिक समाजय् दुहांवःगु न्हूगु चलनत नं क्यनातःगु व थुकियात स्वयेगु मिखा व ग्रहण यायेगु पहः पानाच्वनीगु धयादिल ।

म्येय् मोहनिया झ्वलय् नखत्याय् सकलें मुनां भुतिमालि ब्वयेकाच्वंगु, कूछिभ्वय् नयेगु परम्परा, मोहनिया चालं आदिया लू क्यनातःगु दु ।

ज्याझ्वलय् म्येहालामि तुलाधरं थःगु ब्यान्ड ‘द इन्फ्लुएन्स’या ब्यान्ड मेम्बरत विनय स्थापित, निर्मल तुलाधर, कविन्द्र शाक्य व सुरेन्द्र श्रेष्ठयात हना नं दीगु खः ।

मोहनि नखः वल म्येय् तुलाधरलिसें प्रवेशमान शाक्य, पवित्र कसाः, विनय स्थापित, कविता जोशी श्रेष्ठ, रत्न शोभा महर्जन, प्रतिमा बज्राचार्य व शुभेच्छा तुलाधरं सः बियादीगु दु ।

लिसें हिमालय होटलया थुवाः दिनेश तुलाधर व स्याकार कम्पनीया सौरभ ज्योतिं नं थुगु म्येय् थःगु सः बियादीगु दु ।

म्येया च्वमि अमृत रत्न शाक्य खः । बालकुमार मगर व अनिल मगरं छायाङ्कन यानादीगु भिडियोया सम्पादन ईन्द्र मानन्धरं यानादीगु दु । म्यूजिक भिडियोया निर्देशन सुरेन्द्र मानन्धरं यानादीगु दु ।

भिडियोलय् हिसिला महर्जन, शोभा महर्जन, सलोना बज्राचार्य, म्येच्वमि अमृतरत्नलिसें यक्व हे कलाकारतयसं अभिनय यानादीगु दु ।

थुगु म्येया भिडियो ओएसआर मुभिज युट्युब च्यानलमार्फत सार्वजनिक जूगु दु ।

Categorized in मनोरन्जन