यलया ऐतिहासिक पायः (खड्ग) जात्रायात लोपोन्मुख अवस्थापाखे हाकनं सञ्चालनय् हय्गु निति व पुस्तान्तरणय् निरन्तरता बिइगु निति उल्लेखनीय योगदान बियादीम्ह मानमानेश्वरी भवानी (मुछें आगं) गुथिया मूल नाईके साम्राज्यदेव श्रेष्ठयात हने ज्या याःगु दु।

नेवाः पत्रकार राष्ट्रिय दबू न जात्रायात पुनर्जागरण यायेगु निति परम्पराय् न्हुगु पुस्तायात हस्तान्तरण याना गुथियार तय्स निर्वाह यागु भूमिकाया कदर यासे कोजाग्रत पून्हि कुन्हि छगु ज्याझ्वलय् सम्मान याःगु खः । जात्रा क्वचाय् धुका कोजाग्रत पून्हि कुन्हु यलया महालक्ष्मी द्यःया थाय् प्रसाद ग्रहण यायेगु झ्वलय् प्रहरी प्रशासन, सुरक्षा निकाय, उद्यमी व्यवसायी, जनप्रतिनिधि नाप पत्रकार तयेगु दथुइ अथे हना ज्याझ्वः याःगु खः।

उगु ज्याझ्वलय् नेवाः पत्रकार राष्ट्रिय दबूया केन्द्रीय अध्यक्ष नृपेन्द्रलाल श्रेष्ठं नाईके श्रेष्ठयात हना पौ व संस्कृति, पर्यटन नाप नागरिक उड्डयन मन्त्रालय संस्कृति महाशाखाया प्रमुख सौभाग्य प्रधानांड्डं कलात्मक कलश मतिनाया चिं लःल्हागु खः । मोहनीया महानवमी व दशमी कुन्हु उगु जात्रा सञ्चालन जुइगु याइ। जात्राया निति मानमानेश्वरी भवानीदेवीया दिं फुलपाटी कुन्हु यलया दरबार क्षेत्रया मूलचोकय् विराजमान याइसा जात्रा क्वाचाय् धुका त्रियोदशी कुन्हु द्यःया थाय् हाकन मुछेंय् लित हयेगु परम्परा दु । उगु जात्रा सञ्चालन यायेत गुथि अथांत् मुछे आगंमय् लिच्छविकालीन जुजु मानदेवया वंशया उतराधिकारया रुपं कयातःगु दु।

जात्राया भ्वलय् प्रदर्शन जुइगु स्वपू खड्गयात सामाजिक सहिष्णुताया आधार, दानवप्रवृति विरुद्धया शक्ति प्रदर्शन, तान्त्रिक अनुष्ठान व सत्य त्यागू कथं कायेगु  याइ । मानमानेश्वरी भवानी द्यःयात जुजु मानदेव यागु इष्टदेवया कथं कयातःगु इतिहास दु । थ्व परम्परा गुदँ न्ह्यः लोप जुया वने धुकुगु धलखय् लागु खः । उगु जात्रा हाकन सञ्चालनय् हयेगु निति स्वम्ह पत्रकार प्रशान्त माली, सुनील महर्जन व राजेश बज्रचार्य न संयोजनकारी भूमिकाम्हिता हाकन जात्रा न्ह्याकेगु कुतः याःगु खः निर्वाह याःगु खः । स्वम्ह पत्रकारपि नाप नेवाः पत्रकार राष्ट्रिय दबू यल शाखाया ग्वसालय् २०७३ असोज १७ गते न्हापागु पटक जिल्लाया प्रशासन, स्थानीय निकाय, गुठी संस्थान, गुठीयारपिनिगु छगु बृहत् गोष्ठी ग्वसाः ग्वयेगु ज्या जुगु धका पत्रकार दबूया केन्द्रीय सदस्य नाप कजि राजेश बज्राचार्यं जानकारी बियादीगु खः ।

उगु प्याखं हाकन सञ्चालन यायेगु झ्वलय् गोष्ठीइ वःगु माग, समस्या समाधान, सरोकारवाला, गुठीयार दथुइ समन्वय, स्थानीय निकाय निरन्तर यायेगु निति तयार यायेगु आधार जुगु बज्राचार्यं धयादीगु खः । थ्व हे झ्वलय् गुठीयार, सञ्चार क्षेत्र, नेवाः पत्रकार राष्ट्रिय दबू, उद्यमी, व्यवसायी व महानगरपालिका लगायत सकसिगु कुुतलं २०७४ य् पाटन दरबार क्षेत्रय् पायः जात्रा सञ्चालनया निति क्षमा पुजा याःगु खः । २०७५ सालनिसे पायः जात्रा सञ्चालनय् वःगु खः । उगु ज्याझ्वलय् नेवाः पत्रकार राष्ट्रिय दबूया वरिष्ठ उपाध्यक्ष सुनील महर्जनं अमूर्त संस्कृति संरक्षणय् समुदायया भूमिका दकलय् अप्पो महत्वपूर्ण जुइगु राज्य, प्रशासन, सञ्चार ख्यः व मेमेगु निकाय मिले जुया उकियात सहजीकरण वातावरण तयार याना न्ह्या वनेमाः धक धयादीगु खः ।

सम्मानपत्र ग्रहण याये धुका नाइके श्रेष्ठं जात्रा सञ्चालन यायेत मू भूमिका निर्वाह यायेगु निसे यका थुयिकात निरन्तरता व पुस्तान्तरण तक नेवाः पत्रकार राष्ट्रिय दबू नाप सञ्चारकर्मी लगायत ग्वहालि यानादीपि सकसित सुभाय् बियादीगु खः । 

Categorized in राष्ट्रिय