लहनाय् पिदंगु कविता जर्मनीइ नेपालभाषां वाचन
लहनान्युज | कछलाथ्व ११४७, कार्तिक २९ आईतवाः
खुलायंक जर्मनीया बर्लिन शहरय् जुयाच्वंगु ‘द कोरस अफ टंग्स’ साहित्यिक ज्याझ्वलय् नेपालभाषा कविताया वाचन (अडियो रिकर्ड) नं दुथ्याः दु।
अक्टोबर २०२६ निसें मार्च २०२७ तक खुलायंक न्ह्याइगु उगु अडियो इन्स्टलेशनय् हिमालय लागाया आपालं भाय्या नांदंपिं कविपिनि कविता दुथ्याः। नेपालभाषा कवितापाखे निदँ न्ह्यः लहनाय् पिदंगु आर. मानन्धरया कविता ‘चखुंचिया चिर्चिर’ दुथ्यानाच्वंगु दु।
उगु इन्स्टलेशन गजाःगु धायेबलय् बर्लिनया ऐतिहासिक टेलिफोन बूथ दुने कविताया नम्बर डायल यायेवं टेलिफोनय् कविता न्यनेफइ । अन ३३३ नम्बरय् नेपालभाषाया कविता वाचन आर. मानन्धरया सलय् न्यनेफइ। नापं उकिया अँग्रेजी अनुवादया वाचन ३३४ नम्बरय् न्यनेफइ।
आर. मानन्धरया चखुंचिया चिर्चिर कविता अँग्रेजी अनुवाद जुयाः दछि न्ह्यः प्रतिष्ठित साहित्यिक अनलाइन वर्डस् विथआउट बोडर्सय् प्रकाशित जूगु खः। उकिया अँग्रेजी अनुवाद अमेरिकी कवि प्रो. डेविड हाग्र्रिब्सपाखें जूगु खःसा अँग्रेजी अनुवादया वाचन क्यामरुनया नांदंम्ह लेखक व साहित्यिक क्यूरेटर जेकासु म्याकविबानया सलय् जुयाच्वंगु जुल।
Categorized in राष्ट्रिय