२०८३ मङ्सिर १, सोमबार

देय् दबूया लसता पौ पितब्बज्या

लहनान्युज | कछलाथ्व ११४७, कार्तिक २९ आईतवाः

नेवाः तय्गु मंकाः राष्ट्रिय संगठन नेवाः देय् दबूया ग्वसालय् देय् दबूया हे केन्द्रीय ज्याकू भचातगिं चःमति येँय् नेपाल संवत ११४७ या न्हूदँया लसताय् भिंतुना कालबिल नापं देय् दबूया लसता पौ पितब्वज्या जूगु दु।

देय् दबूया केन्द्रीय नायः रश्मिला प्रजापतिया सभाध्यक्षताय् बागमती प्रदेशया मुख्यमन्त्री किरण थापामगरया मूपाहाँसुइ जूगु खः। मूपाहाँ मुख्यमन्त्री थामामगरं सुकुन्दाय् मत च्याकाः नापं नेपाल संवतया प्रवर्तक शंखधर साख्वाःया किपातय् स्वांमाः क्वखायेकाः ज्याझ्वःया उलेज्या यानादीगु खः ।

अथेहे वय्कलं बागमती प्रदेशय् नेपालभाषा व तामाङ भाषायात सरकारी कामकाजी भाषाया रुपय् मान्यता बिइ धुंकाः आः यायेमाःगु ज्याया नितिं बागमती प्रदेश सरकारलिसे जानाः देय् दबू न्ह्याः वनेत तयार दुगु खँ कनादिल। दबू स्वीनिदँ क्यंगु नापं मोहनी नखः, स्वन्ति नखः व नेपाल संवत् ११४७ न्हूदँया लसताय् उगु लसता पौ पिथंगु खः ।

ज्याझ्वलय् देय् दबूया संरक्षकपिं नरेश कुमार ताम्रकार, पवित्र बज्राचार्य, देय् दबूया सल्लाहकार नापं संघीय सांसद कुलभक्त शाक्य, हलिं नेवाः दबू केन्द्रया कार्यवाहाक नायः समिर महर्जनं नेपाल संवत्या महत्व, स्वन्ति नखःलिसें नेवाःतय्सं यायेमाःगु ज्या व देय् दबूपाखें नेवाःतय्गु नितिं माःगु कथं ज्या याना वने फयेमाः धकाः कामनायासें नेपाल संवत् ११४७ न्हूदँ व स्वन्ति नखःया लसताय् भिंतुना देछायादीगु खः।

ज्याझ्वलय् लःल्हायेगु ल्यंदनिगु मनोनित पौ सल्लाहकारपिं प्राज्ञ प्रतिसरा सायमि, सुरकृष्ण बैद्य व निरञ्जनरत्न शाक्यपिन्त मूपाहाँ बागमती प्रदेशया मुख्यमन्त्री किरण थापामगरं लःल्हानादीगु खः।देय् दबूया मूछ्याञ्जे श्रीकृष्ण महर्जन नेवाः ज्याझ्वः न्ह्याकामि जुयादीगु उगु ज्याझ्वलय् देय् दबूया बरिष्ठ न्वकू सत्यनारायण डंगोलं सुभाय् न्वचू बियादीगु खः।

Categorized in राष्ट्रिय