२०८३ मङ्सिर १, सोमबार

‘पदमरत्न तुलाधर राष्ट्रिय मानव अधिकार नाप शान्ति सिरपाः’ मदुम्ह पत्रकार सुरेशकिरणयात

लहनान्युज | कछलाथ्व ११४७, कार्तिक २९ आईतवाः

नेवाः न्ह्यलुवा, वरिष्ठ मानवअधिकार वादीलिसें साहित्यकार पद्मरत्न तुलाधरया च्यादँया पुण्य तिथि छगू ज्याझ्वः जूगु दु। पदमरत्न स्मृति राष्ट्रिय प्रतिष्ठान व पदमरत्न लुमन्ति गुथि मंकाः ग्वसालय् शंखधर उद्यानय् उगु ज्याझ्वः जूगु खः ।

प्रतिष्ठानया नायः गौरी प्रधानया सभाध्यक्षताय् जूगु उगु ज्याझ्वलय् मूपाहां कथं राष्ट्रिय मानवअधिकार आयोगया अध्यक्ष तपबहादुर मगर व विशेष पाहा कथं येँ महानगरपालिकाया कार्यवाहक प्रमुख सुनिता डंगोलं ब्बति काःगु खः। ज्याझ्वलय् ‘पदमरत्न तुलाधर राष्ट्रिय मानव अधिकार नाप शान्ति सिरपाः’ नेपालभाषा टाइम्सया पुलांम्ह सम्पादक लिसें भाषा आयोगया दुजः मुदम्ह सुरेश किरण मानन्धरयात मरणोपरान्त लःल्हाःगु खः।

उगु सिरपाः वय्कःया जहान सजिना मानन्धरं लःल्हाना कयादीगु खः। ज्याझ्वलय् न्ववासें कार्यवाहक प्रमुख डंगोलं मदुम्ह पद्मरत्नयात झीसं भाषिक अधिकार व मानव अधिकारया निंतिं वय्कलं यानादीगु योगदानया कारणं न्ह्याबलें लुमंकाः च्वने फइ धयादिल।गुथिया नायः डा. केशवमान शाक्यं पद्मरत्नयात लुमंकेगु धइगु हे वय्कलं देय् व जनताया निंतिं संघीयता, धर्मनिरपेक्षता, लोकतान्त्रिक गणतन्त्र व सहभागितामूलक संविधानया निंतिं वय्कलं यानादीगु योगदान जूगु चर्चा यानादिल।

मूपाहां आयोगया अध्यक्ष मगरं पद्मरत्न तुलाधरं थःगु जीवनकालय् न्ह्याकादीगु आपालं घटनाक्रम महत्वपूर्ण जूगु व उकिया अनुशरण याये बह जूगु खँ कनादिल । प्रतिष्ठानया न्वकु प्रा.डा चुन्दा वज्राचार्यं लसकुस यानादीगु ज्याझ्वलय् सांसद कुलभक्त शाक्य, राष्टि सभाया दुजः सुरेश आले मगर, पूर्व मेयर विद्या सुन्दर शाक्य, पूर्व मन्त्री राजेन्द्र श्रेष्ठ लगायतया उपस्थिति दुगु खः।

Categorized in राष्ट्रिय