पत्रकार महासंघं आन्दोलनया ज्याझ्वः घोषणायात
नृपेन्द्रलाल श्रेष्ठ | कछलाथ्व नवमी ११४७, मंसीर २ बुधवाः
नेपाल पत्रकार महासंघं पत्रकारतय्गु पेसागत सुरक्षा व श्रम अधिकारया सुनिश्चितताया निंतिं सरकार विरुद्ध आन्दोलनया ज्याझ्वः घोषणा याःगु दु ।
पत्रकार महासंघया महासचिव रामप्रसाद दाहालं म्हिगः प्रेस विज्ञप्ति जारी यासें आन्दोलनया बारे जानकारी बिउगु खः ।समाचार कक्षय् प्रहरी दुहां वनाः पत्रकारतय्त ज्वंगु, प्रेस स्वतन्त्रता नियन्त्रण यायेगु आज्जु कथं प्रेस काउन्सिल ऐन सम्बन्धी अध्यादेश जारी यायेगु कुतः जूगु व सञ्चार माध्यमय् अनधिकृत रुपय् गाडी दिकूपिंत आः तक कारबाही मजूगु धासें महासंघं आन्दोलनया घोषणा याःगु खः ।
उकथं हे गोरखापत्र लगायत सरकारी व निजी सञ्चार माध्यमय् पत्रकारतय्त जबर्जस्ती पितिउँगु, श्रम अधिकार उल्लंघन जूगु व लोककल्याणकारी विज्ञापन बापत पत्रपत्रिकायात बिया वयाच्वंगु ध्यबा प्रेस काउन्सिल नेपालया सिफारिस कथं मबिउगु विषययात महासंघं आन्दोलनया कारणया रुपय् न्ह्यथनातःगु दु ।
वर्तमान अवस्थाय् प्रेस तथा अभिव्यक्ति स्वतन्त्रताया संरक्षण प्रति सरकारं अनुदार व्यवहार याःगु द्वपं नं महासंघं बिउगु दु।महासंघं सार्वजनिक याःगु ज्याझ्वः कथं थौं २ बजे प्रधानमन्त्रीयात ध्यानाकर्षण पौ लः ल्हायेगु ज्याझ्वः क्वःछिनातःगु दु । मंसिर ५ गते संसदय् प्रतिनिधित्व याइगु फुक्कं राजनीतिक दलया प्रमुखतय्त ध्यानाकर्षण पौ छ्वइगु जूगु दु ।
उकथं हे मंसिर ५ व ६ गते शान्ति व लोकतन्त्रया निंतिं पेसागत सञ्जाल (पापड) लिसे सहलह याइगु ज्याझ्वः दुसा ७ गते फुक्कं जिल्ला शाखां सञ्चार सम्बद्ध संघसंस्था लिसे सहलह यायेगु ज्याझ्वः क्वःछिनातःगु दु।आन्दोलनयात थप सशक्त यायेत मंसिर ९ गते देय्न्यंकंया जिल्ला शाखाया ग्वसालय् जिल्ला प्रशासन कार्यालयय् मुनाः ‘पत्रकारतय् मंकाः गिरफ्तार याः’ धइगु ब्यानरसहित प्रदर्शन यायेगु खँ नं महासंघं धाःगु दु ।
महासंघं थःपिनिगु माग पूमवन धाःसा थप आन्दोलनया ज्याझ्वः घोषणा यायेगु ख्याच्वः नं बिउगु दु ।
Categorized in राष्ट्रिय