२०८३ मङ्सिर ५, शुक्रबार

पत्रकार दबू येँ जिल्लां शंखधर दिवस हनं

लहनान्युज | कछलाथ्व दशमी ११४७, मंसीर ३ बिहीवाः

शंखधर दिवसया व ने.सं. ११४७  न्हूदँया लसताय् नेवाः पत्रकार राष्ट्रिय दबू येँ कचापाखें छगू ज्याझ्वःया दथुइ भिंतुना कालविल लिसें न्हू दँ ११४७ या नगुमा (क्यालेण्डर) पितब्वज्या यात।

लखतीर्थ लिक्क जगत सुन्दर ब्वनेकुथिया सभाहलय् जूगु उगु ज्याझ्वलय् नेवाः पत्रकार राष्ट्रिय दबू येँ जिल्लाया नायः रत्नकाजी मनया सधाध्यक्षताय् जूगु उगु ज्याझ्वलय् मूपाहाँ नेवाः पत्रकार राष्ट्रिय दबूया केन्द्रीय नायः नृपेन्द्रलाल श्रेष्ठं उगु क्यालेण्डरया पितब्वज्या यानादीगु खः।

ज्याझ्वलय् विशेष पाहाँकथं दबूया केन्द्रीय न्वकू सुरेन्द्रभक्त श्रेष्ठ, छ्याञ्जे राजु नापित, जेष्ठ दुजः दानदास श्रेष्ठ, बागमति प्रदेशया नायः विराजकाजी राजोपाध्याय व आदिवासी जनजाति पत्रकार महासंघ (फोनिज) येँ जिल्लाया नायः भीमबहादुर लामा झायादीगु खः। पत्रकार दबू येँ जिल्लाया दुजः लिसें प्रकाशन कमिटीया संयोजक रबिन्द्र बज्राचार्यं लसकुस यानाः न्ह्याःगु ज्याझ्वलय् मूपाहां श्रेष्ठं नेवाः पत्रकारतय् हकहित लिसें थौं कन्हय् राज्यस्तरं छापा पत्रकारपिंत यानाच्वंगु विभेदपूर्ण व्यवहारलिसें पत्रकारपिन्त ज्वनेगु थुज्वःगु थीथी गतिविधियात कयाः विरोधया ज्या न्ह्यानाच्वंगु खँ तयादिगु खः।

नुगःखँ तसें केन्द्रीय न्वकू सुरेन्द्रभक्त श्रेष्ठं पत्रकार दबू नेवाः मुद्दाय् न्ह्यज्यानाच्वंगु व नेवाः आन्दोलन व पत्रकारिता आन्दोलनयात नापनापं न्ह्याका यंकाच्वंगु खँ तयादिसें शंखधर दिवसया लसताय् लाकाः भिंतुना कालबिलया ज्याझ्वलं नेवाः आन्दोलनय् दबूया पलाः अझं न्ह्यज्याःगु खँ तयादिल । वय्कलं प्रदेश संरचना व विदेश शाखा स्वने धुंकाः वय्कःपिनि तकं ब्वतिइ ज्याझ्वः जूगुली नं लसता प्वंकादिल। ज्याझ्वलय् नुगःखँ तयादिसें केन्द्रीय सल्लाहकार राजु शाक्यं थःपिसं राससय् नेपाल संवत्यात छ्यलेत स्वयाबलय् न्हापां सकारात्मक खँ वःसां लिपा पूवंक मखुसे संवत् जक छ्यलेज्या जूगु खँ तयादिल । आः नं राससया मू बुलेटिन स्वल धाःसा नेपाल संवत् खनीगु वय्कलं कनादिल अथेहे बागमती प्रदेश नायः बिराजकाजी राजोपाध्यायं दबूया थःगु हे छेँ दयेकेत पहल यायेमाःगु खँ तयादिल।

सभाध्यक्ष महजर्नं येँ जिल्लां यानाच्वंगु थीथी गतिविधि व न्हूदँया क्यालेण्डरया विषययात कयाः थःगु नुगः खँ प्वंकूसें ज्याझ्वःयात ग्वाहालि यानादीपिं सकलसित सुभाय् देछायादीगु खः। पत्रकार दबूपाखेँ न्हापांगु खुसि थुगु नगुमा (क्यालेण्डर) पिकाःगु खःसा आः याकनं हे ख्वाःपौकथं म्यागजिन पिकायेत्यंगु खँया प्रकाशन कमिटीया संयोजक रबिन्द्र बज्राचार्यं जानकारी बियादिल।

ज्याझ्वलय् यल जिल्लाया नायः मञ्जु बज्राचार्य, गोरखा जिल्लाया नायः हिरालाल श्रेष्ठ, ख्वप जिल्लापाखे सुरेश ख्वाका श्रेष्ठ, नेवाः देय् दबूया न्वकु शान्त श्रेष्ठ, छ्याञ्जेपिं सृजनमान श्रेष्ठ, हरिकुमार श्रेष्ठ, ज्यापु संस्कृति विकास कोषया न्वकु सन्त कुमार महर्जन, वरिष्ठ कलाकार गणेश साय्मि, संस्कृतिविद् जितेन्द्र विलास बज्राचार्यलिसेंया ब्वति दुगु खः।

Categorized in राष्ट्रिय