पत्रकार दबू अस्ट्रेलियाया अध्यक्षय् डा. राजु मानन्धर
लहनान्युज | कछलाथ्व दशमी ११४७, मंसीर ३ बिहीवाः
अस्ट्रेलियाय् ज्या यानाच्वंपिं नेवाः पत्रकारतय्त एकताबद्ध यासें नेपालभाषा पत्रकारिता, मौ लिक संस्कृति व नेवाः समुदायया सामाजिक व सांस्कृतिक गतिविधिया प्रवद्र्धन याय्गु आज्जुं नेवाः पत्रकार राष्ट्रिय दबूया अस्ट्रेलिया शाखा स्वंगु दु।
“नेवाः तजिलजि व मातृभाषा झिगु अभिभारा” धइगु नारा बिसें न्ह्यज्याय्गु नारा बियाः न्ह्याःगु अस्ट्रेलियाय् सक्रिय नेवाः पत्रकारपिन्त संगठित याय्गु, नेपालभाषाय् बुखँ व सञ्चार सामग्री पिथनेगु व नेवाः समुदायलिसें समग्र नेपाःमि समुदायया गतिविधियात पत्रकारितापाखें अभिलेखीकरण याय्गु व प्रवद्र्धन याय्गु आज्जु काःगु दु।
कचाया ज्यासना पुचलय् लुक्ला टिभी अस्ट्रेलियाया प्रधान सम्पादक डा. राजु मानन्धर अध्यक्ष नायः, एभरेस्ट टीभी मिडिया कम्युनिकेसनया ज्याझ्वः निर्देशक, निर्माता व प्रस्तोता रहिन्द्र श्रेष्ठ न्वकु, दीप्ता श्रेष्ठ मूछ्यान्जे व रसना पलाञ्चोके दांभरी ल्यःगु दु।
थुकथं हे श्याम सैंजू, रक्षक श्रेष्ठ व ॐ कृष्ण श्रेष्ठ दुजः ल्यःगु दुसा कानुन व्यवसायी विभूषण जोशीयात कानुनी सल्लाहकारया भाला ब्यूगु दु।
थौ छगु ज्याझ्वः दथुइ पत्रकार दबू अस्ट्रेलियाया नाय डा. राजु मानन्धरयात पत्रकार दबूया नायःपाखे खाडा न्यय्का भिंतुना देछाय्गु ज्या जुगु दु। उगु ज्याझ्वलय् न्वकु सुरेन्द्रभक्त श्रेष्ठ, छ्यान्जे राजु नापित ल्युछ्यान्जे सुनिता महर्जनपिनिगु न ब्बति दुगु खः।
Categorized in राष्ट्रिय