१८ वडां शंखधर दिवस हनं
लहनान्युज | कछलाथ्व त्रयोदशी ११४७, मंसीर ६ आईतवाः
नेपाल संवतया प्रवर्तकलिसें राष्ट्रिय विभूति शंखधर साख्वाःया योगदानयात लुमंकुसे वंगु कछलाथ्व दशमि कुन्हु शंखधर दिवस हंगु दु ।
नेकपा (एमाले) येँ महानगर १८ वडा कमिटीपाखें उगु ज्याझ्वः ग्वसाः ग्वःगु खः ।नेकपा (एमाले) १८ वडा कमिटीया अध्यक्षलिसें १८ वडाअध्यक्ष न्हुछेकाजी महर्जनया सभाध्यक्षताय् जूगु उगु ज्याझ्वलय् नेकपा (एमाले)या केन्द्रीय दुजःलिसें येँ महानगरपालिकाया पुलांम्ह प्रमुख विद्यासुन्दर शाक्य मूपाहां कथं झायादीगु खः ।
शंखधर साख्वाःया झ्वाताय् स्वां देछासे न्ह्याःगु ज्याझ्वलय् नवासें मूपाहां शाक्यं नेपाल संवत् नेपाःया मौलिक संवत् जूगु व थ्व संवत् राष्ट्रिय पहिचानलिसे स्वानाच्वंगु विषय जूगुलिं थुकिया संरक्षण, प्रवद्र्धन यायेगु झी सकसिगुं मंकाः प्रतिवद्धता दयेमाःगु नाप राष्ट्रिय विभूति शंखधर साख्वालं नेपाःया समाजय् बिउगु योगदानया चर्चा यानादिसें नेपाल संवत्या ऐतिहासिक, सांस्कृतिक व सामाजिक महत्वया बारे नुगःखँ तयादीगु खः ।
उगु ज्याझ्वलय् राजधानी प्रदेश कमिटीया दुजःपिं श्याम घिमिरे, कृष्णकुमार अर्याल, सल्लाहकार परिषदया दुजः कविन्द्रशेखर रिमाल, केन्द्रीय निर्वाचन समितिया दुजः रचना शर्मा, निर्वाचन क्षेत्र समनवय कमिटी ७ या संयोजक प्रेमलाल श्रेष्ठ, सचिव बलराम दाहाल, महानगर कमिटीया सचिव धनबहादुर महर्जन तिमिला लगायत आपालं थीथी तहया नेता, कार्यकर्तातय् उपस्थिति दुगु खः ।
Categorized in राष्ट्रिय