देशया थीथी सञ्चार माध्यमय् आबद्ध सम्पादकतसें संसद सचिवालयस न्ह्यब्वःगु प्रेस सम्बन्धि विधेयक लोकतान्त्रिक मूल्य मान्यता व संविधानया मर्म–भावना अःखः जूगु धासें लित काय्त सरकारयात इनाप याःगु दु ।

 

सम्पादक पुचलं थौं विहिवाः विज्ञप्ति पिथसें विधेयकं संविधानं सुनिश्चित याःगु ‘पूर्ण प्रेस स्वतन्त्रता’यात संकुचित याइगु ठहर याःगु दु । २१म्ह सम्पादकपिनिगुपाखें पिथंगु विज्ञप्तिइ न्ह्यथनातःगु दु, ‘सरोकारवालालिसें छुं हे सहलह मयासे, प्रेसयात कयाः सरकार सर्वेसर्वा जुइकथं हःगु प्रेस स्वतन्त्रता विरोधी मिडिया काउन्सिल विधेयक लित कायेत व सरोकारवालालिसेया परामर्शपाखें थुगु विषय सम्बोधन यायेत जिपिं सम्पादकपिं सरकारलिसे माग यानाच्वना ।’

 

नेपाल पत्रकार महासंघलिसें पत्रकारिता सम्बद्ध मेमेगु संस्थां विधेयकया विरोधय् न्ह्याकूगु आन्दोलनय् सम्पादक पुचःया नं ऐक्यबद्धता दुगु विज्ञप्तिइ न्ह्यथनातःगु दु ।

 

पत्रकारिता ख्यलय् गुलिखय् विकृत व असंयमित अभ्यासयात कयाः थःपिं सचेत दुगु व अजाःगु विकृति सम्बोधन यायेगु विधि विकासया आवश्यकता जूगु नं प्रष्ट जूगु विज्ञप्तिइ न्ह्यथनातःगु दु ।