गुथि विधेयक छुं नं हालतय् पास याके मबीगु : कांग्रेस सभापति देउवा
लहनान्युज | ने.सं. ११३९ तछलाथ्व द्वादशि (१४ जुन, २०१९), शुक्रवाः
नेपाली कांग्रेसया सभापति शेरबहादुर देउवां सरकारं हयेत्यंगु गुथि सम्बन्धि विधेयक छुं नं हालतय् पास जुइके मबीगु धयादीगु दु ।
हेटौंडाय् नेपाल साँस्कृतिक संघया प्रशिक्षण मुँज्यायात सम्बोधन यानादिसें पार्टी सभापति देउवां उकथं प्रतिबद्धता प्वंकादीगु खः । वय्कलं गुथि नेपाःया साँस्कृतिक सभ्यता जूगु धयादिसें जनताया कांग्रेसया जनताया पक्षय् न्ह्यज्याइगु व सांसदपाखें पास जुइके मबीगु धयादिल ।
पूर्व प्रधानमन्त्री देउवां दुई तिहाईया घमण्डय् सरकार न्ह्यज्यानाच्वंगु धयादिसें यक्व खँय् बन्देज तयेत स्वःसां नं कांग्रेस छुं नं हालतय् सुम्क च्वनामच्वनीगु ख्याच्वः बियादीगु दु । लोकतन्त्रय् सरकारं प्रेसयात आक्रमण याःगु धयादिसें देउवां छगू स्वतन्त्र संस्थायात अंकुश तयेगु नितिं सरकारं विधेयक हयाच्वंगु नं धयादिल ।
स्वतन्त्र संस्थातय्गु अधिकार लाका कायेगु पक्षय् सरकार खनेदुगु नं देउवां द्वपं बियादिल । सरकारं मानव अधिकार आयोगया अधिकार लाका कयाः तानाशाह व निरंकुशताया संकेत ब्यूगु देउवाया धापू खः ।
देशय् खनेदयाच्वंगु असमानता, दण्डहिनता, भ्रष्टाचारं नेपाःयात ल्यूने घ्वाना यंकाच्वंगु धयादिसें वय्कलं थौंकन्हय् हत्या, हिंसा, बलात्कारया घटनां प्रसय प्राप्त यानाच्वंगु धयादिल ।
सरकारं कानूनी राज्यया महसूस जनतायात बी मफूगुलिं न्हियांन्हिथं अपराध अप्वया वनाच्वंगु सभापति देउवाया तर्क दु ।
Categorized in राजनीति
