घुस काःगु धेबालिसें सिनियर डिभिजन इञ्जिनियरयात ज्वन
लहना न्यूज | ने.सं. ११३९ दिल्लागा तृतिया (२० जुलाइ, २०१९), सञ्चरवाः
जलस्रोत तथा सिंचाई विकास डिभिजन कार्यालय दोलखाया सिनियर डिभिजन इन्जिनियरलिसें ३म्ह कर्मचारीतय्त घुस काःगु धेबालिसें ज्वंगु दु ।
अख्तियार दुरुपयोग अनुसन्धान आयोगया पुचलं सिनियर डिभिजन इन्जिनियर प्रकाश अधिकारी, जलश्रोत तथा सिंचाई विकास डिभिजन कार्यालय, सिन्धुपाल्चोकया इन्जिनियर भोगेन्द्र शाह व सवारी चालक सुमन खड्कायात शंकास्पद धेबालिसें नियन्त्रणय् काःगु खः ।
थीथी उपभोक्ता समिति व मेमेगु कम्पनीलिसें घुस कयाः बा १ झ ५२८० ल्याःया सरकारी गाडी येँ वयाच्वंगु धइगु सूचंया लिधंसाय् आयोगया गाडीइ खानतलासी याःगु खः ।
ख्वपया जगातीइ गाडी पनाः खानतलासी याःगु इलय् सिनियर डिभिजन इन्जिनियर अधिकारीपाखें १३गू लख ८द्वः व न्यासः व उगु हे गाडिइ च्वनावःम्ह इन्जिनियर शाहपाखें १गू लख २९द्वः सच्छि व न्यातका शंकास्पद धेबा लूगु अख्तियारया प्रवक्ता प्रदीप कोइरालां जानकारी बियादिल ।
अथे हे, ड्राइभर सुमन खड्कालिसें बा १ झ ५२८० ल्याःया टोयोटा हाइलक्स गाडीयात नियन्त्रणय् कयाः अनुसन्धान जुयाच्वंगु नं प्रबक्ता कोइरालां जानकारी बियादीगु दु ।
Categorized in अपराध
