जनजाति संकिपाकःमि पिनिगु गोष्ठी क्वचाल
लहनान्युज | दिल्लागा औसी ११३९ (अगष्ट १ २०१९)
आदिवासी जनजाति तयेगु मातृभाषी संकिपाकःमिपिनिगु स्वन्हुयंकंया गोष्ठी बुधवाः क्वचाःगु दु ।
चलचित्र विकास बोर्डया आदिवासी जनजाति मातृभाषी चलचित्र प्रवर्द्धन समितिया ग्वसालय् जूगु ‘संघ संस्थातय्गु भावी रणनीति तर्जुमा व सक्षमता विकास तालिम’ नांयागु वर्कसप जुगु खः ।
नेपाः दुने दूगु थीथी आदिवासी मातृभाषी संकिपाकःमिपिनिगु उगु वर्कसपय् मुक्कं १३ गु संस्थाया दुजःपिन्सं ब्वति दुगु खः ।
उगु वर्कसपय् मुक्कं ६५ म्हेसिनं प्रशिक्षण काःगु खःसा मू स्रोत ब्वक्ति कथं संस्थागत क्षमता अभिबृद्धि विज्ञ नहकुल केसीं संघ संस्थायात गुकथं न्ह्याकेगु व थःथःगु वार्षिक योजना गथे यानाः दयेकेगु धइगु प्रशिक्षण बियादीगु खः ।
अथेहे वर्कसपय् बरिष्ठ सिनेपत्रकार लिसें बरिष्ठ निर्देशक व नेपाल आदिवासी जनजाति चलचित्र महासंघया संस्थापक उपाध्यक्ष विजयरत्न असंबरें आदिवासी जनजाति संकिपायात कयाः कार्यपत्र न्ह्यब्वयादीगु खः । सिष्टम युनिभर्सिटी अफ मेरिल्याण्डया प्रा.डा. विष्णु घिमिरें आदिवासी संस्कृतिया विषयस खँ तयादीगु खः ।
उगु समापन ज्याझ्वलय् मूपाहाँ कथं चलचित्र विकास बोर्डया नायः केशव भट्टराई नं वर्कसपय् ब्वति कयादीपिन्त दसिपौ लःल्हानादीगु खः । मूपाहाँ भट्टराई नं आदिवासी जनजाति संकिपा ख्यःया विकास जुइगु न्ह्याग्गु नं खँय् थःम्हं साथ बिइ धकाः बचं बियादीगु खः ।
समापन ज्याझ्वः नाप ग्वसाः खलःया कजि सूर्य चेम्जनोङया सभाध्यक्षताय् न्ह्याःगु खःसा ज्याझ्वलय् प्रशिक्षार्थीपिंपाखें युवराज राई (वीर बहादुर), मगर चलचित्रकःमि संघया नायः युवराज मास्के मगर, मू स्रोत व्यक्ति नहकुल केसी, नेपाल आदिवासी जनजाति चलचित्र महासंघया न्वकू विकु थोकरपिन्सं नुगःखँ तयादीगु खः ।
